Петропавл полицейлері интернет-алаяқтықтың мыңнан астам әрекетінің алдын алды

Петропавлда жыл басынан бергі алғашқы үш айда интернет-алаяқтықтың 1,4 мыңнан астам әрекетінің жолы кесілді, деп хабарлайды QZ NEWS тілшісі.

Бұл деректер Солтүстік Қазақстан облысы полиция департаментінің бастығы Абай Жүсіповтың төрағалығымен өткен жұмыс кеңесінде айтылды. Жиында қалалық полиция басқармасының қызметі қорытындыланды.
Петропавл қалалық полиция бөлімшесі өңірдегі ең ірі құрылым болып қалып отыр және қоғамдық тәртіпті қамтамасыз етуде негізгі жүктемені атқарады. Қалалық полиция бастығы Серік Әлжановтың мәліметінше, есепті кезеңде қылмыс деңгейі жалпы 11,3 пайызға төмендеген. Әсіресе ауыр құқық бұзушылықтар бойынша айтарлықтай оң динамика байқалады – олардың саны екі еседен астам қысқарған.

Сондай-ақ бопсалау мен тонау деректері азайып, ұрлық, оның ішінде пәтер ұрлықтары төмендеген.

Сонымен қатар, ең күрделі бағыттардың бірі ретінде қашықтан жасалатын алаяқтық әлі де өзекті болып отыр. Қабылданып жатқан шараларға қарамастан, бұл саладағы төмендеу әзірге мардымсыз.

Дегенмен профилактикалық жұмыстар нақты нәтиже беруде: жыл басынан бері 1441 алаяқтық әрекетінің жолы кесілді. Бұл жағдайларда қала тұрғындары дер кезінде алаяқтармен байланысты үзіп, полицияға жүгінген, соның арқасында қаржылық шығындардың алдын алу мүмкін болды.