Петропавл қаласы әкімдігінде елдің жаңа Негізгі заңының жобасы талқыланды
Қалалық әкімдіктің мәжіліс залында Петропавл қаласының әкімі Серік Мұхамедиевтің төрағалығымен Қазақстан Республикасының жаңа Конституциясы жобасына арналған актив отырысы өтті. Құжат ауқымды жаңғыртуды көздейді: жоба қолданыстағы Конституция нормаларының 84 пайызын қамтиды, деп хабарлайды QZ News тілшісі.
Жиынды аша отырып, қала әкімі негізгі өзгерістердің бірі – 145 депутаттан тұратын бір палаталы Парламент – Құрылтайға көшу екенін атап өтті. Сонымен қатар саяси жүйеде жаңа жоғары консультативтік орган – Қазақстанның Халық Кеңесі және Вице-Президент институты пайда болады.
Маңыздысы – алдағы уақытта заңға енгізілетін кез келген өзгеріс тек республикалық референдум арқылы ғана жүзеге асырылатын болады.
«Жаңартылған Конституция жобасы Кіріспеден, 11 бөлімнен және 95 баптан тұрады. Өзгерістер Негізгі заң мәтінінің басым бөлігін қамтиды: қолданыстағы Конституцияның 104 бабының 77-сі, яғни шамамен 84 пайызы қайта қаралған.
Жаңа редакциядағы Кіріспеде алғаш рет адам құқықтары мен бостандықтарының басымдығы мемлекеттік саясаттың негізгі құндылығы ретінде тікелей бекітіледі. Сонымен қатар Қазақстан халқы мемлекеттік биліктің бірден-бір қайнар көзі әрі егемендіктің иесі екені айқын көрсетіледі», – деді Серік Мұхамедиев.
Мемлекеттіліктің негізі ретінде қоғамның бірлігі мен ынтымақтастығы, этносаралық және конфессияаралық келісім белгіленді. Актив отырысында әлеуметтік блокқа ерекше назар аударылды. Депутат әрі педагог Ләззат Жолмұханова жаңа Конституция ең алдымен өсіп келе жатқан ұрпақты қорғауға бағытталғанын атап өтті.
«Мен бұл құжатқа мұғалім ретінде қараймын. Негізгі сұрақ – бұл балаларға не береді? Мемлекет тәрбие мен қауіпсіздікке қатысты жауапкершілікті күшейтеді. Енді басты назар есептер мен органдарға емес, әрбір баланың қадір-қасиетіне аударылады. Мектеп тек білім беру орны ғана емес, тұлға қалыптастыратын орта ретінде танылады. Білім беру мен тәрбие жүйесінің зайырлы сипаты бекітіліп, бұл елдің барлық азаматтарының тең әрі үйлесімді дамуына берік негіз қалайды және мемлекеттің болашағына бағдарланған. Білім саласы қызметкерлері үшін тұлғааралық қатынастарды дамыту аса маңызды. Жастар мен оқушыларға қажеттінің барлығы жаңа жобада қарастырылған», – деп атап өтті Ләззат Жолмұханова.
Сондай-ақ «Ардагерлер ұйымы» қоғамдық бірлестігінің төрағасы Жангелді Тәжин сөз сөйледі. Оның айтуынша, елдің жаңа Негізгі заңының жобасы азаматтардан, саяси партиялардан, қоғамдық ұйымдар мен сарапшылардан түскен ұсыныстарды жан-жақты талдау, ашық қоғамдық талқылаулар және жаңа нормалар мен ережелерді терең пысықтау нәтижесінде әзірленген.
«Қалалық ардагерлер кеңесі мен ардагерлер ұйымдары Президент айтқан бастамалардың маңызын түсіне отырып, аға буын өкілдерімен жасанды интеллект дәуіріндегі еліміздің әлеуметтік-экономикалық дамуына оң ықпал ететін жаңа саяси реформа туралы талқылаулар жүргізетін болады. Конституциялық реформа ең алдымен халықтың мүддесі үшін және оның тікелей қатысуымен жүзеге асырылуда», – деді Жангелді Тәжин.
Жиынды қорытындылай келе, Петропавл қаласының әкімі қала активіне прокуратура мен полиция басқармасының жаңа басшыларын таныстырды. Қазақстан Республикасы Бас Прокурорының бұйрығымен әділеттің аға кеңесшісі Ғалымжан Әубәкіров Сайранұлы тағайындалды. Ал Петропавл қалалық полиция басқармасының басшысы болып Әлжанов Серік Дарханұлы тағайындалды.