Петропавлда апатты жағдайдағы ағаштар жарық бағанасын құлатты
Петропавл қаласында Назарбаев пен Партизанская көшелерінің қиылысында ескі ағаш құлады. Ауыр діңгек көше жарығының бетон бағанасына зақым келтіріп, жанында тұрған үйеңкі ағашын да іліп кеткен. Оқиғаның басты себебі – жасыл желектердің апатты жағдайға жетуі, деп хабарлайды QZ NEWS тілшісі.
Қалалық тұрғын үй-коммуналдық шаруашылығы бөлімінің мәліметінше, аталған аумақта ескі терек пен үйеңкі ағаштары өсіп тұрған. Бұған дейін олардың жоғарғы бөлігі кесіліп, діңдері қатты қисайған күйде болған. Ағаштардың табиғи тозуы, шіру процестері мен саңырауқұлақтармен зақымдануы салдарынан тамыр жүйесі әлсіреген. Салмағының ауырлығы мен қатты еңкеюіне байланысты ағаш өз жүктемесіне төтеп бере алмаған.
Тексеру барысында құлаған ағаш діңдерінің өзегі биологиялық зақымданулар салдарынан толықтай бүлінгені анықталды. Сырт көзге ағаштар қалыпты көрінгенімен, ішкі ақаулар тұрғындардың өміріне айтарлықтай қауіп төндірген.
Бұл жағдай қала аумағындағы ескі және апатты ағаштарды дер кезінде анықтап, ауыстырудың маңыздылығын тағы бір мәрте көрсетті.