Петропавлда Counter-Strike 2 бойынша ірі киберспорттық турнир басталды
Kozybayev University базасында танымал киберспорттық дисциплина — Counter-Strike 2 бойынша ауқымды жастар турнирі басталды. Өңірдегі ең ірі геймерлік іс-шаралардың бірін «Eko Time» қоғамдық бірлестігі Cyber Sport League SKO және Cyber Sports Federation SKO жобаларымен бірлесіп ұйымдастырды, деп хабарлайды QZ NEWS тілшісі.
Турнирдің алғашқы күні қатысушыларды тіркеуден және салтанатты ашылу рәсімінен басталды. Таңғы бағдарламаның ең әсерлі сәттерінің бірі жеребе тарту болды. Командаларды турнирлік кестеге барынша ашық әрі әділ бөлу үшін ұйымдастырушылар дәстүрлі лототронды пайдаланды. Осыдан кейін алғашқы тартысты матчтарға старт берілді.
Киберспорт мерекесі тек ойыншыларға ғана емес, жанкүйерлерге де бағытталған. Турнир барысында университет аумағында интерактивті аймақтар жұмыс істеуде. Көрермендер үлкен экраннан виртуалды тартыстарды тікелей эфирде тамашалап, кәсіби комментаторлардың пікірлерін тыңдай алады, түрлі байқауларға қатысып, естелік сыйлықтар ұтып алу мүмкіндігіне ие.
Сонымен қатар бағдарлама аясында команда капитандарымен жедел сұхбаттар, ауқымды фото және бейнетүсірілімдер ұйымдастырылуда.
Солтүстік Қазақстан облысының үздік киберспорттық командасының есімі жуырда белгілі болады. Жеңімпаздар мен жүлдегерлерді марапаттаудың ресми рәсімі 22 маусым күні өтеді.
Ұйымдастырушылар студенттерді, мектеп оқушыларын және компьютерлік спорт жанкүйерлерін Kozybayev University қабырғасында өтіп жатқан турнирге келіп, ойыншыларға қолдау көрсетуге және СҚО-дағы ауқымды цифрлық қозғалыстың бір бөлігі болуға шақырады.