Петропавлда «Дармарка» экожәрмеңкесі өтті

Солтүстік Қазақстан облысы М. Қозыбаев атындағы университетте ерекше алаң — «Дармарка» жәрмеңкесі ұйымдастырылды. Ол республикалық «StopMusor» жобасы аясында өткізіліп, студенттерді, «AMANAT» партиясының өкілдерін және қаланың эко-активистерін біріктірді, деп хабарлайды QZ NEWS.

Кездесудің негізгі мақсаты — заттарды саналы пайдалану мәдениетін насихаттау болды.
«Дармарка» — қажетсіз заттарға екінші өмір сыйлайтын, қарапайым әрекеттерді қоршаған ортаны қорғауға нақты үлеске айналдыратын кеңістік. Қоқысқа тасталудың орнына, осы заттар жаңа иелеріне табысталды. Сонымен қатар, алаңда пластик жинау ұйымдастырылып, оны кейін қайта өңдеуге жіберу қарастырылды.

«Дармарка» сияқты форматтар арқылы біз экологиялық жағдайды жақсартуға әр адамның қатыса алатынын көрсетеміз: қоқысты сұрыптаудан бастап, заттарды қайта қолдануға дейін. Экологиялық мәселелер күнделікті өмірдің бір бөлігіне айналуы өте маңызды, әсіресе жастар үшін», — деп атап өтті «AMANAT» партиясының «Болашақ» филиалының атқарушы хатшысы Александр Зель.

Заттарды алмастырудан бөлек, қатысушылар эко-викториналар мен интерактивтер арқылы өз білімдерін тексерді. Ұйымдастырушылардың пікірінше, мұндай акциялар Петропавлдың жастарында дұрыс экологиялық дағдылар қалыптастырып, қарапайым тұрмыстық қоқысқа жаңа көзқараспен қарауға мүмкіндік береді.