Петропавлда мерзімдерді бұзған және пәтерге сапасыз жөндеу жасаған мердігер жазаланды

Петропавл қаласының №2 соты пәтерді жөндеу бойынша шартты тиісінше орындамаған мердігерге қатысты істі қарады. Жергілікті тұрғын мердігерге қарсы талап арыз беріп, шартты бұзуды, алдын ала төленген қаражатты қайтаруды және келтірілген шығынды өтеп беруді сұраған, деп хабарлайды QZ NEWS.

Талапкер бір бөлмелі пәтерді жөндеу туралы шарт жасап, 200 000 теңге көлемінде алдын ала төлем жасаған. Алайда мердігер келісілген мерзімді бұзып, атқарған жұмыстары сапасыз болған.

Сот талқылауы барысында мердігердің міндеттемелерді орындаудың мүмкін еместігін дәлелдей алмағаны анықталды. Тартылған мамандардың қорытындылары да жұмыстың тиісінше орындалмағанын және қайта жөндеуді қажет ететінін көрсетті.

«Сот шешімімен талапкердің талабы ішінара қанағаттандырылды: мердігерлік шарт бұзылды, берілген қаражат, материалдық шығын және моральдық зиян өтемі өндірілді», – деп хабарлады Петропавл қаласының №2 сотында.

Сот шешімі заңды күшіне еніп, тұтынушының сапасыз қызмет пен мерзімнің бұзылуы салдарынан келтірілген зиянды өндіруге құқығын растады.