Петропавлда Отбасы күніне орай ескі саябақ аумағына қайың, қарағай, жөке және шетен көшеттері отырғызылды
Халықаралық отбасы күніне орай Петропавлдағы ескі саябақта «Отбасылық уақыт аллеясы» атты облыстық экологиялық акция өтті. Шараға оқушылар, ата-аналар, педагогтер мен қоғам белсенділері қатысты, деп хабарлайды QZ NEWS тілшісі.
Қатысушылар ондаған жас ағаш көшеттерін отырғызып, экологиялық бастаманы табиғатқа қамқорлық пен ұрпақтар сабақтастығын дәріптейтін нағыз отбасылық мерекеге айналдырды.
Іс-шараны Солтүстік Қазақстан облысы білім басқармасының әдістемелік орталығы ұйымдастырды. Акцияға Петропавлдағы 36 мектептің өкілдері, жалпы саны шамамен 108 адам қатысты. Саябақ аумағына жаңа қайың, қарағай, жөке және шетен ағаштары отырғызылды. Әр көшеттің жанына отбасылар өздері дайындаған атаулы тақтайшалар орнатылды. Орталық әдіскері Евгения Колесникованың айтуынша, акцияның мақсаты тек қаланы көгалдандыру ғана емес, сондай-ақ отбасылық құндылықтарды нығайту.
«Балалардың ата-аналарымен бірге игі әрі пайдалы істерге қатысуы өте маңызды. Отбасы болып ағаш отырғызып, оған күтім жасау — бірлікті арттырып, жауапкершілікке тәрбиелейді. Өткен жылы акция тек қалалық деңгейде өтсе, биыл облыстық деңгейге шықты», — деді ол.
Ұйымдастырушылардың айтуынша, көптеген отбасылар жобаға алғаш рет қатысып отырған жоқ. Евгения Колесникованың өзі де шараға ұлдары, әжесі мен атасымен бірге келген. Өткен жылы отырғызған ағаштары жақсы жерсініп, отбасы оларға күтім жасауды жалғастырып келеді.
№26 мектептің 6-сынып оқушысы Глеб Колесников мұндай акциялар жасөспірімдердің экологияға деген көзқарасын өзгертеді деп есептейді.
«Қазір көптеген адамдар табиғат туралы ойланбайды, ағаштарды кесіп, қоқыс қалдырады. Ал экологиялық мәселелер барлығымызға қатысты. Егер біз жиі ағаш отырғызып, қоршаған ортаға ұқыпты қарасақ, табиғатты болашақ ұрпақ үшін сақтап қала аламыз», — деді оқушы.
Шараның ерекше атмосферасын қатысушылардың отбасылық оқиғалары толықтыра түсті. Акцияға алғаш рет Рамазановтар отбасы қатысты. №12 мектептің жас педагогтері Аида мен Ғали Рамазановтар төрт жасар ұлдары Ахматпен бірге келген. Бұл күн олардың отбасы үшін символдық мәнге ие болды — жас қайыңның жанына отбасы тегi жазылған тақтайшаны кішкентай Ахмат өз қолымен орнатты. Аида Рамазанова мұндай бастамаларға қатысу әсіресе жас ата-аналар үшін маңызды екенін айтты.
«Ұлымызға табиғатты кішкентайынан қорғау керектігін көрсеткіміз келді. Бұл — отбасымен бірге уақыт өткізіп, қала үшін пайдалы іс жасаудың жақсы үлгісі», — деді ол.
№14 мектептің оқушысы Полина Марцинишина ата-анасымен бірге шетен ағашын отырғызды. Оның айтуынша, өзге отбасылармен бірге еңбек ету ерекше әсер сыйлайды.
«Адамдардың бірге жиналып, ағаштарға күтім жасап, суарып жүргені өте керемет. Бізге Жер — ортақ үйіміз екенін және оған қамқор болу керектігін үйретеді. Су тасқынынан кейін Ойқала шағын ауданында көп ағаш қурап қалды, сондықтан қазір қайтадан көгалдандыруға тырысып жатырмыз», — деді мектеп оқушысы.
Ұйымдастырушылар «Отбасылық уақыт аллеясы» алдағы уақытта жақсы дәстүрге айналады деп сенеді. Жас ағаштар балалармен бірге өсіп, қатысушыларға отбасы бірлігінің, табиғат алдындағы жауапкершіліктің және туған қалаға деген сүйіспеншіліктің маңызын еске салып тұрмақ.