Петропавлда «синтетиканың» ірі партиясымен колледж студенті ұсталды

Петропавл қаласында полицейлер кезекті есірткі сатушының заңсыз әрекетін әшкереледі. Күдікті жергілікті колледждің студенті болып шықты, енді оған ұзақ мерзімге бас бостандығынан айыру жазасы қаупі төніп тұр, деп хабарлайды QZ News тілшісі.

Жедел-іздестіру шаралары барысында полиция қызметкерлері есірткіні жасыру арқылы байланыссыз әдіспен сатумен айналысқан студентті ұстады. Жеке тінту кезінде одан кристалл тәрізді заты бар 31 орама табылып, тәркіленді. Алдын ала мәлімет бойынша, бұл жалпы салмағы шамамен 40 граммды құрайтын α-PvP синтетикалық есірткісі, бұл ірі көлем болып саналады.
Тәркіленген заттар сараптамаға жіберілді, тергеу амалдары жүргізілуде.

Психотроптық заттарды сату фактісі бойынша жас жігітке 12 жылға дейін бас бостандығынан айыру жазасы қаупі бар. СҚО полициясы алаңдатарлық үрдісті атап өтті: есірткі бизнесі барған сайын «жасарып» барады. Өткен жылы өңірде есірткі сатқаны үшін 69 адам ұсталған, олардың жартысынан көбі (40 адам) — 25 жасқа дейінгі жастар.

Еске сала кетейік, бұған дейін де 21 жастағы қала тұрғыны ұсталған болатын. Одан кристалл тәрізді ақ түсті зат салынған 30 орама тәркіленді, алдын ала болжам бойынша — α-PVP. Тәркіленген заттың салмағы шамамен 70 граммды құрады.