Петропавлда студенттер зияткерлік баттлда бақ сынасты
Петропавл қаласында С. Мұқанов атындағы кітапханада «Қазақстан – ортақ үйіміз» атты зияткерлік ойын өтті. Іс-шара алдағы Қазақстан халқының бірлігі күніне орай ұйымдастырылды, деп хабарлайды QZ NEWS тілшісі.
Сайысқа қала колледждерінен 50-ге жуық студент қатысты. Қоғамдық даму және ақпарат орталығының ұйымдастырушылары жастардың білімін шыңдап қана қоймай, елдегі этностардың тарихы мен дәстүрлерін тереңірек тануына мүмкіндік беретін мазмұнды бағдарлама әзірледі.
Бағдарлама бірнеше тақырыптық кезеңнен тұрды. Алғашқы «Әртүрліліктегі бірлік» кезеңінде командалар жылдам ойлау және талартан тыс шешім табу қабілеттерін көрсетті. Қатысушылар ұлттық салт-дәстүрлерге, рухани құндылықтарға және халықтардың мәдени мұрасына қатысты ұғымдарды түсіндірді.
Екінші кезеңде зияткерлік викторина өтіп, студенттер Қазақстан этностарының дәстүрлері туралы сұрақтарға жауап беріп, логикалық тапсырмаларды орындады және өз командаларына ұпай жинады.
Ұйымдастырушылардың айтуынша, бұл ойын тек білім сайысы ғана емес, сонымен қатар қарым-қатынас, өзара түсіністік және қоғамдық келісімнің маңызын ұғынуға арналған алаң болды.
«Мұндай зияткерлік алаңдар жастарды бірлік, келісім және патриотизм сияқты ортақ құндылықтар төңірегінде біріктіреді. Осындай іс-шаралар арқылы біз Қазақстан – түрлі этнос пен мәдениет өкілдері бейбіт өмір сүретін ортақ үй екенін тағы бір мәрте еске саламыз», – деді
Қоғамдық даму және ақпарат орталығының жастарды қолдау секторының нұсқаушысы, іс-шара ұйымдастырушысы Оксана Гончаренко.
Оның айтуынша, жастар осы үйлесімділікті сақтауда маңызды рөл атқарады, ал мұндай жобалар белсенді азаматтық ұстаным мен ел болашағына жауапкершілік сезімін қалыптастыруға ықпал етеді.
Ойын қорытындысы бойынша қазылар алқасы жеңімпаздарды анықтап, оларға дипломдар мен естелік сыйлықтар табыстады. Дегенмен, қатысушылардың пікірінше, кездесудің басты нәтижесі жиналған ұпайлардан гөрі, бірлік, достық және елдің мәдени әртүрлілігіне деген құрмет атмосферасы болды.