Петропавлда «Trash Art Fest — қоқысты өнерге айналдырамыз» атты шеберлік сабағы өтті
Петропавл қаласында «Trash Art Fest — қоқысты өнерге айналдырамыз» атты шығармашылық шеберлік сабағы ұйымдастырылды. Іс-шара Мемлекет басшысының бастамасымен қолға алынған Таза Қазақстан экологиялық бастамасы аясында өтті, деп хабарлайды QZ NEWS.
Шеберлік сабағының басты идеясы – тұрмыстық қалдықтарға екінші өмір сыйлауға болатынын көрнекі түрде көрсету. Іс-шара барысында балалар ата-аналарымен бірге пластик бөтелкелер мен картон қораптар сияқты қайта өңделетін материалдардан құстарға арналған жемсауыттар жасады. Қатысушылар қайта өңдеу мен заттарды қайта пайдаланудың тек пайдалы ғана емес, сонымен қатар шығармашылық тұрғыдан қызықты екенін тәжірибе жүзінде байқады.
«Таза Қазақстан» экологиялық бағдарламасы қоғамда жаңа экологиялық мәдениет қалыптастыруға бағытталған. Бұған дейін Қазақстан Республикасының Президенті Қасым-Жомарт Тоқаев тазалық пен табиғатқа ұқыпты қарау бір реттік акция емес, әр азаматтың күнделікті өмір салтына айналуы тиіс екенін атап өткен болатын. Оның айтуынша, қоршаған ортаға қамқорлық жеке жауапкершілік пен нақты әрекеттен басталады.
Петропавл қалалық Жастар ресурстық орталығының жетекшісі Абдин Дамир Балташұлы мұндай бастамалардың отбасы мүшелерін біріктіріп, жас ұрпақтың бойында дұрыс құндылықтарды қалыптастыруға ықпал ететінін айтты:
«Бүгінде балалар мен ата-аналарды бірлескен экологиялық іс-шараларға тарту аса маңызды. Шығармашылық арқылы біз қоршаған ортаға саналы көзқарас қалыптастырамыз. Бұл шеберлік сабағы жай ғана жемсауыт жасаумен шектелмей, Мемлекет басшысы “Таза Қазақстан” бағдарламасы аясында көтеріп отырған тазалық пен жауапкершілік мәдениетін тәрбиелеуге қосылған үлес болды».
«Қарындаш» көркемсурет мектебінің жетекшісі Кондрашова Татьяна Викторовна шараның шығармашылық маңызын атап өтті:
«Өнер идеядан басталады. Біз балаларға ең қарапайым материалдардың өзі пайдалы әрі әсем бұйымға айнала алатынын көрсеткіміз келді. Мұндай формат қиялды дамытып, экологиялық ойлауды қалыптастырады және бұрын қажетсіз деп саналған дүниелердің құндылығын көруге үйретеді».
Ұйымдастырушылардың айтуынша, «Trash Art Fest» отбасылық қарым-қатынасқа, идея алмасуға және бірлескен шығармашылыққа арналған алаңға айналды. Іс-шараның басты мақсаты – экологиялық мәдениетті қалыптастыру, табиғатқа жанашырлықты дамыту және өңір тұрғындарын экологиялық бастамаларға белсенді тарту.