Петропавлда велосипед ұрлығымен айналысқан ұры ұсталды

Петропавлда криминалдық полиция қызметкерлері велосипед ұрлығының бірнеше дерегін ашты. Мамыр айының басынан бері қала тұрғындарынан аулаларда қалдырылған велосипедтердің жоғалғаны туралы көптеген арыздар түсе бастаған. Күдікті негізінен түнгі уақытта әрекет етіп, көпқабатты үйлердің кіреберістеріне бекітілген ұрлыққа қарсы қорғаныс тростарын үзіп отырған, деп хабарлайды QZ NEWS тілшісі.

СҚО Полиция департаментінің мәліметінше, зардап шеккендердің қатарында жазғы демалыс қарсаңында велосипедтерінен айырылған үш баланың ата-анасы бар. Сонымен қатар, жергілікті велоспорт әуесқойларының бірі құны бір миллион теңге болатын «Compel» маркалы арнайы велосипедінің ұрланғанын хабарлаған.

– Жедел-іздестіру іс-шаралары барысында күдікті қысқа мерзімде анықталды. Ол облыс орталығының 36 жастағы тұрғыны болып шықты. Бұған дейін де осындай мүліктік қылмыстар жасағаны үшін бірнеше рет сотталған. Ер адамның тұрғылықты мекен жайы жоқ, тіркелген мекенжайында тұрмай, құқық қорғау органдарынан жасырынған. Күдікті қалалық аквапарк ауданында ұсталды. Қазіргі уақытта ол уақытша ұстау изоляторына қамалды. Қылмыстық іс аясында оның сегіз эпизодқа қатысы бар екені дәлелденді, – деп хабарлады ведомствоның баспасөз қызметі.

Ұсталған азамат ұрланған мүлікті сатып үлгермеген. Қазіргі уақытта тәртіп сақшылары оның қала аумағының әртүрлі жерлеріне тастап кеткен жеті велосипедті тауып, тәркіледі. Қажетті тергеу әрекеттері аяқталғаннан кейін барлық көлік құралдары заңды иелеріне қайтарылады.

Жыл басынан бері Солтүстік Қазақстан облысында велосипед ұрлығының 18 фактісі тіркелген. Оның 12-сі ашылған. Полицейлер азаматтарды өз мүлкін қараусыз қалдырмауға және сенімдірек қорғаныс құлыптары мен бекіту құрылғыларын пайдалануға шақырады.