Петропавлда жоғары кәсіби-педагогикалық колледж студенттері құқықтық сауаттылық мәселелерін талқылады
Петропавлда Солтүстік Қазақстан жоғары кәсіби-педагогикалық колледжі базасында «Құқықты білу, сөз айту құқығы» атты ашық диалог өтті. Іс-шара «Заң және тәртіп» республикалық бағдарламасы аясында ұйымдастырылды, деп хабарлайды QZ NEWS тілшісі.
Кездесу дөңгелек үстел форматында өтіп, оған студенттер, құқық қорғау органдарының өкілдері, заңгерлер және жастармен жұмыс істейтін мамандар қатысты.
Шара Петропавл қаласының Жастар ресурстық орталығының бастамасымен болды. Диалогтың негізгі мақсаты – жастардың құқықтық сауаттылығын арттыру, белсенді азаматтық ұстанымды қалыптастыру, сондай-ақ кәмелетке толмағандар мен жастар арасындағы құқықбұзушылықтың алдын алу.
Ашық пікір алмасу форматы қатысушыларға мамандарға тікелей сұрақ қойып, өзекті тақырыптар бойынша түсініктеме алуға мүмкіндік берді. Талқылау барысында азаматтардың құқықтары мен міндеттері, әкімшілік және қылмыстық құқықбұзушылықтар үшін жауапкершілік, сондай-ақ интернет-алаяқтық пен дропперлік сияқты жастарға төнетін заманауи қауіптер қарастырылды.
Бірінші полиция бөлімінің жергілікті полиция қызметі бөлімшесінің бастығы, полиция майоры Қанат Жұмабаевтың айтуынша, мұндай кездесулер тұрақты түрде өткізіліп келеді.
«Біз колледжбен бірлесіп осындай профилактикалық іс-шараларды тұрақты негізде өткіземіз. Олар бізді шақырады, ал біз студенттерге әкімшілік және қылмыстық құқықбұзушылықтардың алдын алу туралы түсіндіру жұмыстарын жүргіземіз», – деді Қанат Жұмабаев.
Оның сөзінше, кездесу барысында интернет-алаяқтық, жастарды заңсыз әрекеттерге тарту мәселелеріне, сондай-ақ мұндай әрекеттерге қатысудың салдарын түсіндіруге ерекше назар аударылды.
Петропавл қалалық Жастар ресурстық орталығы басшысының міндетін атқарушы Айсұлу Бекімова мұндай алаңдардың маңыздылығын атап өтті.
«Бұл іс-шараның мақсаты – жастарда тұрақты құқықтық білім қалыптастыру, қауіпсіз мінез-құлық дағдыларын дамыту, құқық қорғау органдарына деген сенімді арттыру, сондай-ақ жастар күрделі өмірлік жағдайларда дұрыс бағдар алып, өз азаматтық ұстанымын саналы түрде қалыптастыра алатын ашық әрі конструктивті диалог алаңын құру», – деді Айсұлу Бекімова.
Кездесу барысында учаскелік полиция инспекторы, полиция капитаны Шыңғысхан Бекенов, кәмелетке толмағандар істері жөніндегі комиссия хатшысы Елена Завьялова және Отбасын қолдау орталығының заңгері Гүлмира Шайпина сөз сөйледі. Спикерлер жастар тап болуы мүмкін нақты өмірлік жағдайларды талдап, өз құқықтарын қорғау және қауіпсіз мінез-құлық бойынша практикалық кеңестер берді.
Кәмелетке толмағандар арасындағы құқықбұзушылықтың алдын алу, заңсыз әрекеттер үшін жауапкершілік және құқықтық қорғану дағдыларын қалыптастыру мәселелеріне ерекше назар аударылды. Қатысушылар талқылауға белсенді қатысып, өз пікірлерімен бөлісіп, күнделікті жағдайлар мен күрделі құқықтық мәселелер бойынша сұрақтар қойды.
Ұйымдастырушылардың мәліметінше, жыл басынан бері Петропавл қаласының Жастар ресурстық орталығы мамандары жастармен 40-тан астам профилактикалық кездесу өткізген. Мұндай жүйелі жұмыс құқықтық мәдениетті нығайтуға, ақпараттандыру деңгейін арттыруға және жас азаматтардың жауапкершілігін қалыптастыруға бағытталған.
Өткен диалог жастар мен мемлекеттік және қоғамдық құрылым өкілдері арасындағы өзара іс-қимылды нығайтатын тағы бір тиімді алаңға айналып, мұндай форматтағы кездесулердің өзектілігін тағы бір мәрте дәлелдеді.