Петропавлдағы Ұлттық ұлан академиясы волейболдан Қазақстан чемпионы атанды

15–18 ақпан күндері Павлодар қаласында Қазақстан Республикасы Ұлттық ұланының волейболдан чемпионаты өтті. Додаға ведомствоның бөлімдері мен оқу орындарының үздік құрамалары қатысып, жоғары спорттық дайындық пен командалық үйлесімділікті көрсетті, деп хабарлайды QZ NEWS.

Тартысты өткен жарыс қорытындысы бойынша Петропавл қаласындағы Қазақстан Республикасы Ұлттық ұланының академиясы құрамасы бірінші орынды иеленді.

Команда турнир бойы сенімді әрі тұрақты ойын өрнегін көрсетіп, шешуші кездесулерде қарсыластарынан басым түсіп, ведомстволық спорттағы көшбасшылардың бірі екенін дәлелдеді.
Кездесулер динамикалық әрі ымырасыз сипатта өтті. Волейболшылар қорғаныс пен шабуылда үйлесімді әрекет етіп, сауатты тактикалық дайындықтарын және шешуші сәттердегі сабырлылықтарын көрсетті. Әсіресе жартылай финал және финалдық ойындар көрермендердің ерекше қызығушылығын тудырды. Әрбір доп беру мен әрбір ұпай шешуші рөл атқарды.

Командалық жетістікпен қатар, петропавлдық ойыншылар жеке номинациялар бойынша да марапатталды. «Үздік ойыншы» атағы команданың жалпы жеңісіне зор үлес қосқан Ғаниев Рахат Ренатұлына берілді. Ал «Үздік байланыстырушы» номинациясын Нұрлыбай Бахтияр Маратұлы иеленді. Оның дәл пастары мен шабуылды ұйымдастыру шеберлігі жеңіске жетудің маңызды факторына айналды.

Ұйымдастырушылардың айтуынша, чемпионат мықтыларды анықтайтын алаң ғана емес, сонымен қатар Ұлттық ұланның спорттық дәстүрлерін нығайтуға, тәжірибе алмасуға және әскери қызметшілер мен курсанттардың дене дайындығын арттыруға мүмкіндік берді. Мұндай жарыстар бұқаралық спортты дамытуға, командалық рухты қалыптастыруға және өңіраралық байланысты күшейтуге ықпал етеді.