Петропавлдың орталық алаңында «Кітап әлемі» тақырыбында 500 адамның басын қосқан ауқымды іс-шара өтті
Петропавл қаласының басты алаңында Ұлттық кітап күні кең көлемде аталып өтті. СҚО білім басқармасы «Кітап әлемі» атты ауқымды іс-шара ұйымдастырды, деп хабарлайды QZ NEWS тілшісі.
Іс-шараға 500-ден астам адам қатысты. Олардың қатарында оқушылар, ата-аналар, педагогтер және СҚО жазушылары бар.
Фестивальдің салтанатты ашылуында СҚО білім басқармасының басшысы Айнагүл Сұрағанова кітаптың барлық уақытта білімнің, рухани бағдардың және ішкі күштің көзі болып келгенін атап өтті. Оның айтуынша, сөз арқылы адамның ойлау жүйесі, мәдениеті мен дүниетанымы қалыптасады. Ұлттық әдебиеттің де маңызы зор. Абай Құнанбаев пен Мағжан Жұмабаев сынды ұлы ойшылдар мен ақындардың мұрасы бүгінгі күні де жас ұрпаққа рух беріп, олардың өзіндік болмысын тануына ықпал етеді.
«Мереке тек бүгінмен шектелмейді. 13 сәуірден бастап барлық білім беру ұйымдарында балалар әдебиетінің онкүндігі мен тақырыптық апта өтуде. Оның аясында әдеби сағаттар, байқаулар, көрмелер және авторлармен кездесулер ұйымдастырылып жатыр. Бүгін облыстың барлық мектептері мен колледждерінде Мағжан Жұмабаевтың өлеңдерін 10 минут бойы оқу акциясы өтті. Бұл таңдау кездейсоқ емес. Ол – біздің көрнекті жерлесіміз, терең лирика мен биік руханияттың ақыны. Оның шығармалары бүгін де өзекті әрі әр оқырманға жақын. Аталған акция 73 мың оқушы мен 11 мың студентті қамтыды. Бүгінгі шара – бұл шығармашылық пен қарым-қатынасқа арналған ашық алаң. Қатысушыларды байқаулар, театрландырылған қойылымдар, шеберлік сабақтары, интерактивті алаңдар мен әдеби кездесулер күтуде», – деді Айнагүл Сұрағанова.
Бағдарлама мазмұнды әрі қызықты өтті. Әр қатысушы өзіне ұнайтын бағытты таба алды.
Алаңның түрлі бөліктерінде «Мағжан оқулары» мен «Абай оқулары» байқаулары, театрландырылған қойылымдар, иллюстрациялар мен комикстер жасауға арналған шығармашылық шеберханалар, «Әжемнің ертегілері» интерактивті алаңы, open-air дәрістері мен поэзиялық алаң ұйымдастырылды.
Фестиваль аясында «Ашық микрофон» алаңы ерекше сұранысқа ие болды. Ол «Абай мен Пушкин» ескерткіші жанында орналасып, кез келген адамға сүйікті өлеңдерін, прозалық шығармалардан үзінділерді немесе өз туындыларын оқуға мүмкіндік берді.
Сондай-ақ оқушылар әлем әдебиетінің танымал шығармалары бойынша викториналарға белсенді қатысып, өз білімдерін сынады.
Иллюстрациялар мен комикстер жасауға арналған шығармашылық шеберхана да ұйымдастырылды. №8 эстетикалық тәрбие беру мектеп-кешенінің оқушылары өз шеберліктерін көрсетті. Бейнелеу өнері бағытының оқушылары қазақ және орыс ертегілеріндегі кейіпкерлердің бейнесін жасап, ашық аспан астындағы шығармашылық үдеріс қала тұрғындарының қызығушылығын тудырды.
Мектептердің бірінің оқушылары театрландырылған перформанс ұсынып, Бердібек Соқпақбаевтың «Менің атым – Қожа» повесінен әсерлі көрініс қойды.
Қазақ әдебиетінің классикалық туындысына негізделген қойылым көрермендердің зор қызығушылығын туғызды. Бұл шығармашылық нөмір фестиваль қонақтарына сүйікті кейіпкердің тарихын еске салып, ұлттық әдеби мұраның жас ұрпақ тәрбиесіндегі маңызын айқындай түсті.
Айнагүл Сұрағанованың айтуынша, білім беру жүйесінің алдында оқу мәдениетіне тұрақты қызығушылық қалыптастыру міндеті тұр. Осындай іс-шаралар алдағы уақытта тұрақты түрде өткізіліп тұрады.