Қазақстанда жаңа жылдық дастарқанға арналған азық-түлік қаншалықты қымбаттады
Қазақстандықтар жаңа жылдық дастарқанға жиі сатып алатын кейбір азық-түлік өнімдері жекелеген онлайн-супермаркеттерде орта есеппен 18%-ға қымбаттаған. Соңғы деректерге сәйкес, Қазақстандағы жылдық инфляция деңгейі 12,4%-ды құрайды. Бұл — 508 тауар мен қызмет түрі бойынша бағаның орташа өсімі, деп хабарлайды QZ NEWS NUR.KZ сайтына сілтеме жасап.
Әрбір тауардың қымбаттауы немесе арзандауы әртүрлі қарқынмен жүруі мүмкін. Сондай-ақ бағалар мен олардың өзгерісі өңірлерге, тіпті бір қаланың ішіндегі сауда нүктелеріне байланысты айтарлықтай айырмашылық танытады.
Жаңа жылдық дастарқан мен мерекелік тағамдарды әзірлеуге қазақстандықтар жиі алатын кейбір азық-түлік өнімдерінің қаншалықты қымбаттағанын Алматы тұрғындары үшін MagnumGO және Arbuz.kz онлайн-супермаркеттеріндегі ұқсас тауарлардың бағасын салыстыру арқылы анықтадық.
Кездейсоқ таңдап алынған 25 өнімнің бастапқы бағасы 2024 жылғы желтоқсанда тіркелсе, соңғы бағалар 2025 жылғы 24 желтоқсанда белгіленді. Осы аралықта олардың бір жыл ішіндегі өзгерісін қарастырайық.
Айта кетейік, зерттеу барысында өткен және ағымдағы кезеңдерде түрлі акциялар мен жеңілдіктер қолданылған тауарлар да қамтылған.
Жаңа жыл мандаринмен тығыз байланысты. Бұл жеміс те бір жыл ішінде қымбаттаған. Марокколық мандариндер 14,5%-ға өсіп, бір келісі 1 716 теңге болса, жапырағымен сатылатын қытайлық мандариндер 11,8%-ға қымбаттап, 1 430 теңгеге жеткен.
Ал ананас әуесқойлары үшін жағымды жаңалық бар — олардың бағасы 13,3%-ға төмендеп, бір келісі 975 теңгені құрады. Алайда мұздатылған, текшеленіп туралған ананастар керісінше 38,2%-ға қымбаттап, 300 граммы 1 499 теңгеге жеткен.
Тәттілер де — жаңа жылдық мерекенің басты нышандарының бірі. Алайда олар да айтарлықтай қымбаттаған, әсіресе «Рахат» компаниясының отандық өнімдері. Мәселен, «Вечер» кәмпиттерінің бағасы 24,2%-ға өсіп, бір келісі 3 029 теңге болса, «Маска» кәмпиттері 18%-ға қымбаттап, 4 379 теңгеге жеткен.
Ал Konti компаниясының «Алтын лалагүл» («Золотая лилия») кәмпиттерінің бағасы бір жыл ішінде өзгермей, бір келісі 3 853 теңге деңгейінде қалған.
Жаңа жылдық дастарқандағы ыстық тағамдардың бірі — тауық еті. Таңдалған дүкенде бұл өнім де қымбаттаған. Атап айтқанда, «Алель» маркалы мұздатылған бройлер тауық еті 23,2%-ға өсіп, бір келісі 1 999 теңге болса, осы марканың тауық филесі 22,7%-ға қымбаттап, 2 709 теңгеге жеткен.
Күнбағыс майының бағасы біркелкі өспеген. Мысалы, «Маслозавод №1» маркалы майдың бір литрі 6,5%-ға қымбаттап, 896 теңге болса, «Олейна» майы 37,9%-ға өсіп, 1 099 теңгені құраған. Ыстық тағамдар мен салаттардың негізгі құрамдас бөлігі саналатын жұмыртқа бағасы да тауардың санаты мен түріне қарай әртүрлі өзгерген.
Мәселен, QarQus маркалы сұрыпталған жұмыртқалар 3,2%-ға қымбаттап, он данасы 913 теңге болса, осы компанияның жоғары санатты жұмыртқалары 24,4%-ға өсіп, 933 теңгеге жеткен.
Енді жаңа жылдық салаттардың негізгі ингредиенттеріне тоқталайық. «3 Желания Провансаль» майонезінің 700 граммдық қаптамасы 37,9%-ға қымбаттап, 1 595 теңге болған.
«3 желания» маркалы консервіленген жасыл бұршақ (400 мл) 18,1%-ға өсіп, 750 теңге болса, Bonduelle (425 мл) өнімінің бағасы 25,8%-ға қымбаттап, 1 289 теңгені құраған. Сол маркадағы жүгері (212 мл) мен қызыл бұршақ (425 мл) тиісінше 26,3% және 23,3%-ға өсіп, 769 теңге және 1 059 теңге болған. Diamant тарталеткаларының бағасы 33,3%-ға қымбаттап, 745 теңгеге жеткен.
Алкогольсіз сусындарға деген талғам әртүрлі болғанымен, олардың көпшілігі де өткен жылмен салыстырғанда қымбаттаған.
Мәселен, Beta Tea қара жапырақты шайының 500 граммдық қаптамасы 23,6%-ға өсіп, 4 759 теңге болса, Tess Pina Colada шайы 12,5%-ға қымбаттап, 20 пакетке 955 теңге болған. Ал «Үміт и Ко» маркалы 3,2% майлылығы бар сүттің бағасы айтарлықтай өзгермей, небәрі 0,3%-ға өсіп, бір литрі 602 теңгені құраған.
«Сады Придонья» маркалы қызанақ дәмді шырынының бір литрі 16,4%-ға қымбаттап, 945 теңге болса, жасыл алма дәмдісі 16,7%-ға өсіп, 935 теңгеге жеткен. Ал көлемі 2 литрлік Coca-Cola газдалған сусыны 5,5%-ға қымбаттап, 829 теңге болған.
Осылайша, біз таңдаған онлайн-супермаркеттерде жаңа жылдық дастарқанға арналған кейбір азық-түлік өнімдерінің бағасы орта есеппен 18%-ға өскенін байқауға болады. Айта кетейік, олардың құнын өткен жылмен салыстырғандағы айырмашылық өңірлерге және жекелеген сауда орындарына байланысты өзгеруі мүмкін.