«ҚазАвтоЖол» АҚ СҚО жүргізушілерін 8 қаңтарда ауа райының нашарлауы туралы ескертеді

Қазақстанның жол қызметтері күшейтілген дайындық режиміне көшірілді. «ҚазАвтоЖол» АҚ мәліметінше, бейсенбі, 8 қаңтарда, еліміздің алты өңірінде, оның ішінде Солтүстік Қазақстан облысында, күрделі метеорологиялық жағдай күтіледі, деп хабарлайды QZ News тілшісі.

Синоптиктер қар жауып, боран соғатынын болжап отыр, бұл автожолдарда көрінудің төмендеуіне және қар үйінділерінің пайда болуына әкелуі мүмкін. Табиғи қолайсыздық әсер ететін өңірлер қатарында СҚО-дан бөлек:

Ақтөбе облысы;
Шығыс Қазақстан облысы;
Батыс Қазақстан облысы;
Қостанай облысы;
Абай облысы бар.

Мамандар жүргізушілерді аса мұқият болуға, арақашықтықты және жылдамдық режимін сақтауға шақырады. Мүмкіндігінше түнгі уақытта алыс жолға шықпау ұсынылады.
Жолдардың жай-күйі туралы ақпаратты тәулік бойы жұмыс істейтін 1403 нөмірлі колл-орталықтан нақты уақыт режимінде алуға болады.

Синоптиктердің болжамынша, 8 қаңтарда Солтүстік Қазақстан облысының батысында қар, боран күтіледі, облыстың солтүстігінде — аздаған қар, сырғыма жүреді. Жел солтүстік-батыстан соғып, оңтүстік-батысқа ауысады, облыстың батысы мен шығысында жел екпіні 15–20 м/с жетеді.

Петропавл қаласында күндіз аздаған қар жауып, сырғыма жүреді.