СҚО-да «Бір ауыл – бір өнім» жобасының жартылай финалистері анықталды
Солтүстік Қазақстан облысында «Бір ауыл – бір өнім» жобасының өңірлік кезеңінің қорытындысы шығарылды. Жуырда Петропавлда өткен көрме-жәрмеңкеден кейін, бұл туралы QZ NEWS сараптамалық комиссия республикалық деңгейде өңір намысын қорғауға үміткер 20 жартылай финалисті анықтағанын айтқан болатын.
Еске сала кетейік, жыл сайынғы көрме-жәрмеңке 15 мамыр күні «Dostyq Mall» сауда-ойын-сауық орталығында өтті. Биыл оған 42 тауар өндіруші қатысты: олардың 14-і Петропавл қаласынан болса, тағы 28-і облыс аудандарынан келген кәсіпкерлер. Келушілерге жергілікті өнімдердің түр түрі ұсынылды — ет деликатестері мен сүт өнімдерінен бастап, қолөнер бұйымдары, тоқыма, ағаш, былғары және киізден жасалған өнімдерге дейін.
Солтүстік Қазақстан облысы Кәсіпкерлер палатасының директоры Есжан Оразалиннің айтуынша, көрме қорытындысы бойынша ең үздік 20 жоба іріктеліп, байқаудың екінші кезеңіне өтті. Енді қатысушылар өз жобаларын өңірлік бренд-комитет алдында қорғайды.
«Қорғау нәтижесінде он жеңімпаз анықталады. Дәл осы кәсіпкерлер Солтүстік Қазақстан облысын “Бір ауыл – бір өнім” республикалық көрме-жәрмеңкесінде таныстырады. Сонымен қатар, олар бизнесті одан әрі дамыту үшін бес миллион теңге көлеміндегі грантқа үміткер бола алады», — деді ол.
Сонымен қатар, Есжан Оразалиннің сөзінше, көрме жергілікті өндірушілерге жаңа іскерлік байланыстар орнатуға мүмкіндік берген. Сауда-ойын-сауық орталығының өкілдері де алдағы уақытта ынтымақтастықты жалғастыруға қызығушылық танытып, жоба қатысушыларын болашақ жәрмеңкелерге шақыруға дайын екендерін білдірді.
Жартылай финалистер қатарында түрлі бағыттағы өнім өндірушілер бар. Олардың ішінде жартылай дайын өнім, ірімшік, сүт өнімдері, ұлттық тағамдар, былғары, киіз, ағаш және саздан жасалған бұйымдар өндірушілері бар. Қатысушылар қатары Петропавлмен ғана шектелмей, Қызылжар, Тайынша, Мамлют, Аққайың, Айыртау, Уәлиханов аудандарын, сондай-ақ Мағжан Жұмабаев және Ғабит Мүсірепов атындағы аудандарды қамтыды.
Атап айтқанда, байқаудың екінші кезеңіне Қызылжар ауданынан жартылай дайын өнім өндіруші Майра Нұрқанова, Мамлют ауданынан мамықтан бұйым жасайтын Юлия Бикина, петропавлдық шеберлер Айжан Дайырова киіз бұйымдарымен және Александр Волобуев шұжық өнімдерін өндіру жобасымен өтті. Сонымен қатар, жартылай финалистер қатарында ірімшік, қымыз, ешкі сүтінен жасалған йогурт, құрт, ет деликатестері мен ұлттық тоқыма өнімдерін өндірушілер де бар.
«Бір ауыл – бір өнім» жобасы «Атамекен» Ұлттық кәсіпкерлер палатасы мен өңірлік кәсіпкерлер палаталарының бірлесуімен жүзеге асырылып келеді. Жобаның мақсаты – жергілікті өндірісті дамыту және жергілікті шикізаттан жасалған өнімдерді ілгерілету.