СҚО-да мектепке пневматикалық қару әкелген жоғары сынып оқушысына қатысты тексеріс жүргізілуде

Петропавл қаласындағы мектептердің бірінде жоғары сынып оқушысының сабаққа тапанша алып келуіне байланысты орын алған шулы оқиғаға Солтүстік Қазақстан облысы Полиция департаменті түсініктеме берді, деп хабарлайды QZ NEWS «Курсивке» сілтеме жасап.

Ведомствоның мәліметінше, аталған қару атыс қаруы емес, пневматикалық болып шыққан. Оқиға салдарынан зардап шеккендер жоқ. Дегенмен, дау туғызған оқушы мен оның ата-анасы жауапкершілікке тартылатын болады.

«Тексеру қорытындысы бойынша кәмелетке толмаған жасөспірім ұсақ бұзақылық жасағаны үшін әкімшілік жауапкершілікке тартылды, ал оның заңды өкілі бала тәрбиесі мен қауіпсіздігін қамтамасыз ету жөніндегі міндеттерін тиісінше орындамағаны үшін жауапқа тартылды. Білім беру органдарына орын алған жағдайға ықпал еткен себептер мен жағдайларды жою бойынша шаралар қабылдау туралы ұсыным енгізілді», – деп хабарлады Полиция департаменті.

Тексеру аяқталғаннан кейін мектеп басшылығы мен аталған оқу орнының қауіпсіздігіне жауапты күзет агенттігінің қызметкерлеріне қатысты қандай да бір шара қолдану мәселесі шешілетін болады.