СҚО-ның екі аудандық ХҚКО-сында электронды кезекке талонды алдын ала брондау жүйесі енгізілуде
Солтүстік Қазақстан облысында мемлекеттік қызмет көрсету саласына заманауи цифрлық сервистерді енгізу жалғасуда. 20 ақпаннан бастап өңірдегі тағы екі халыққа қызмет көрсету орталығы электронды кезек талондарын алдын ала брондау бойынша пилоттық форматта жұмыс істеуге көшеді. Атап айтқанда, бұл Ақжар және Айыртау аудандарының ХҚКО-ларына қатысты, деп хабарлайды QZ NEWS.
СҚО бойынша Азаматтарға арналған үкімет мемлекеттік корпорациясының филиалы хабарлағандай, жаңа тәртіп халыққа қызмет көрсету орталығына бару үшін ыңғайлы күн мен уақытты алдын ала таңдауға мүмкіндік береді. Бұл азаматтарға өз уақытын тиімді жоспарлауға және күту залдарындағы жүктемені азайтуға жағдай жасайды.
Қабылдауға жазылу бірнеше тәсіл арқылы жүзеге асырылады: «ЦОН» мобильді қосымшасы арқылы, электрондық үкімет порталы арқылы, сондай-ақ 1414 Бірыңғай байланыс орталығының телефоны арқылы.
Жазылу рәсімделгеннен кейін өтініш берушіге брондаудың расталғаны туралы SMS-хабарлама жолданады. Бұл ретте дайын құжаттарды беру және өзіне-өзі қызмет көрсету секторында қызмет алу бұрынғы тәртіппен, яғни алдын ала жазылусыз жүргізіледі. Ведомство өкілдерінің мәліметінше, ерекше жағдайларда және алдын ала брондау мүмкін болмаған кезде қарт адамдарға, Ұлы Отан соғысының ардагерлеріне, ерекше қажеттіліктері бар азаматтарға, сондай-ақ шетелдік азаматтарға қызмет көрсету үшін бір жұмыс орны қарастырылған.
«ЦОН» мобильді қосымшасына қол жеткізу жеке сәйкестендіру нөмірі мен телефон нөмірі арқылы авторизациядан өткеннен кейін жүзеге асырылады. Қосымша App Store және Google Play платформаларында жүктеуге қолжетімді.
Пилоттық жобаны іске асыру алдын ала брондау жүйесінің сұранысы мен қолайлылығын бағалауға мүмкіндік береді. Талдау қорытындысы бойынша сервисті одан әрі енгізу және өңірдің басқа да халыққа қызмет көрсету орталықтарында оның қолданылуын кеңейту мәселесі қарастырылады.