СҚО Қызылжар ауданында оқушылардың ҚР заңнамасын білу деңгейі тексерілді

5–9 сынып оқушылары арасында құқықтық олимпиада Бескөл №2 орта мектебінде өтті. Қызылжар ауданының түкпір-түкпірінен жиналған оқушылар Қазақстан заңнамасы бойынша білімдерін сынады, деп хабарлайды QZ News тілшісі.

Бұған дейін олимпиаданың мектепішілік кезеңі өткен болатын. Үздіктер аудан орталығына келіп, өз білімдерін көрсетуге мүмкіндік алды. Іс-шара «Заң және тәртіп» тұжырымдамасы аясында ұйымдастырылды.

Ұйымдастырушылардың айтуынша, басты мақсат – тек білімді тексеру ғана емес, сонымен қатар оқушыларға заң нормалары, құқықтары мен міндеттері туралы түсіндіру.

«Менің ойымша, біздің жастар өз құқықтарын – өмір сүру, бостандық, білім алу сияқты құқықтарын білуі тиіс. Әрине, өз міндеттерін де ұмытпауы керек. Жастар Қазақстан заңдарын сақтауы қажет. Осындай қарапайым дүниелерден ортақ жауапкершілік басталады», – деді Қызылжар ауданы ішкі саясат бөлімінің басшысы Гүлия Салтықова.

Зияткерлік сайысқа қатысушылар жазбаша түрде сұрақтарға жауап берді. Тапсырмалар «Заң және тәртіп» тақырыбы аясында біріктірілді. Құқықтық бағыттағы қарапайым сұрақтардың өзі оқушыларды құндылықтар мен моральдық нормалар туралы ойлануға жетеледі.