Су айдындарының мәртебесінің болмауы СҚО фермерлерінің инвестицияларына қауіп төндіреді
«AMANAT» партиясы жанындағы СҚОФ кәсіпкерлік мәселелері жөніндегі үйлестіру кеңесінің отырысында өңір бизнесмендері дамуға кедергі келтіріп отырған негізгі тосқауылдарды атады. Солардың бастысы – су қорғау аймақтарының мәртебесінің анықталмауы және мемлекеттік гранттарға қолжетімділіктің шектеулі болуы, деп хабарлайды QZ NEWS.
Облыстағы 2100-ден астам су айдынының тек 92-сі ғана ресми түрде рәсімделген. Ал кәсіпкерлер су айдындарынан 500 метр қашықтықта орналасқан, бірақ әкімдік қаулысына енгізілмеген 600-ден астам жер учаскесін алған. Бұл кез келген уақытта жер пайдаланушылар өз учаскелеріне қатысты құқықтарын даулау әрекеттерімен бетпе-бет келуі мүмкін дегенді білдіреді. Жерге орналастыру жобаларында бұл аймақтар белгіленіп, актілерде және жалдау шарттарында көрсетілгеніне қарамастан, қауіп сақталып отыр. Әңгіме шаруашылықтарын дамытуға, нысандарды жаңғыртуға және несиелік бағдарламаларға қомақты қаржы құйған фермерлер туралы болып отыр.
ЖК өкілі Айдос Кеңпейіловтың айтуынша, бұл өңірге инвестиция салып, даму мен қайта жаңғыртуға, несие бағдарламаларына қаржы жұмсаған жүздеген фермер үшін құқықтық тәуекел туғызады.
«Бізге нақты алгоритм керек: аймақтарды белгілеу, су айдындарын құжаттарға енгізу және адал еңбектеніп, өңірге инвестиция салған азаматтарды заң жүзінде қорғау қажет», — деді кәсіпкер.
Ауыл шаруашылығы және жер қатынастары басқармасының мәліметінше, 2026–2027 жылдарға арналған жоспарға 11 аудан мен Петропавлдағы 102 су нысаны үшін су қорғау аймақтары мен белдеулерінің жобаларын жасау енгізілген.
Екінші маңызды мәселе – мемлекеттік гранттар. Кәсіпкерлердің айтуынша, бүгінгі күні өтеусіз қолдау негізінен әлеуметтік осал топтарға қолжетімді, ал жұмыс орындарын ашуға дайын, бастамашыл және белсенді тұрғындар қолдаусыз қалып отыр.
Кәсіпкерлер палатасы мен «ДАМУ» қоры барлық азаматтарға қолжетімді, іріктеу критерийлері ашық болатын конкурстық гранттардың пилоттық бағдарламасын пысықтауға дайын екенін білдірді.
Бұған қоса, Саумалкөлдегі мобильді байланыс мәселесі көтерілді: ІІМ ҚАЖД нысанындағы байланыс жабдықтарының жұмысына байланысты желі жиі үзілетіндіктен төлемдерді қабылдауға кедергі келтіреді. ҚАЖ департаменті байланыс операторларымен бірге жабдыққа техникалық түзету жүргізуге уәде берді.
Отырыс барысында субсидиялар кешігуі, күрделі ветеринарлық талаптар және Сергеевка – Сарыкөл жолының апатты жағдайы да талқыланды. Салаға жауапты ведомстволар көтерілген мәселелерді шешу бойынша нақты ұсыныстар дайындауға уәде етті.