Зираттарды қоқысқа айналдырмаңыздар: Протоиерей Сергий Первушин петропавлдықтарға үндеу жасады

Петропавлда қала әкімдігінің ұйымдастыруымен Новопавловка және Жұмысшы кенті аумағындағы екі зиратта кең көлемді қоқыс тазарту жұмыстары жүргізілді. Жұмыс барысында шамамен 200 текше метр қоқыс шығарылды, деп хабарлайды QZ NEWS.

Қасиетті орындарда бейберекет қоқыс үйінділерінің пайда болуы Петропавл және Булаев епархиясының хатшысы, протоиерей Сергий Первушиннің тұрғындарға арнайы үндеу жасауына себеп болды.

«Құрметті бауырлар мен апа-қарындастар, бәріңізге жүгінгім келеді: зиратқа бара жатқанда оның қандай орын екенін естен шығармай, бұл қасиетті жерде қоқыс үйінділерін жасамайық», – деді протоиерей Сергий Первушин.

Дін қызметкері, әсіресе, зираттарды ластап жатқан жасанды ритуалдық бұйымдарды пайдалану мәселесіне назар аударды.

«Біз көптеген пластик гүл шоқтарын әкелеміз. Бір жылдан кейін олар күнге күйіп, түсі өзгереді. Содан кейін оларды қайда тастайтынымызды білмейміз. Табиғатты ластайтын пластик әкелгіміз келе ме, соны алдын ала ойланайық. Мүмкін, орнына тірі гүлдер әкелген дұрыс шығар? Олар табиғи түрде шіріп, ешқандай із қалдырмайды», – деді ол.

Протоиерей тұрғындарды жауапкершілікке шақырды.

«Егер біз бұл жерге бір нәрсе әкелсек, онда өз артынан жинап, қоқысты өзімізбен бірге алып кетіп, арнайы контейнерге тастауға болатынын ұмытпайық. Оны көрші немесе ортақ қабірдің жанына үйіп кету дұрыс емес», – деп атап өтті Сергий Первушин.