2025 жыл үшін көлік салығын қазақстандықтар қандай мөлшерлемелер бойынша төлейді
2026 жылы жаңа Салық кодексінің қабылдануына байланысты көлік салығы саласында өзгерістер күтіледі. Қазақстандықтар 2025 жыл үшін қандай тәртіппен төлейтіні белгілі болды, деп хабарлайды QZ NEWS NUR.KZ-ке сілтеме жасап.
Жаңа Салық кодексі көлік салығы тарифтеріне бірқатар түзетулер енгізуді көздейді. Мысалы, ескі автокөліктер үшін жеңілдіктер енгізу және кейбір көліктерге салынатын жоғары ставкалы салықты алып тастау жоспарланған.
Бұл өзгерістер 2026 жылғы 1 қаңтардан бастап күшіне енеді. Алайда көлік салығын төлеу есептік салық кезеңінен кейінгі жылдың 1 сәуіріне дейін жүзеге асырылады: яғни 2025 жыл үшін 2026 жылы төлеу қажет.
Мемлекеттік кірістер комитетінің түсіндіруінше, 2025 жылға көлік салығының сомасы 2025 жылы қолданыста болатын Салық кодексінің редакциясындағы 492-бапқа сәйкес есептеледі. Демек, ескі автокөліктерге жеңілдіктер қарастырылған жаңа нормалар 2026 жыл үшін қолданылады. Тиісінше, жаңа ставкалар бойынша төлем 2027 жылғы 1 сәуірге дейін жүргізіледі.
Ал 2026 жылғы 1 сәуірге дейін төленетін төлемге «ескі» кодекстің (яғни 2025 жылға қолданыстағы редакцияның) нормалары қолданылады: жеңіл автокөліктерге салынатын салық қозғалтқыш көлеміне байланысты 1-ден 117 АЕК-ке дейін (2025 жылға 3 692–431 964 теңге) құрайды.
Мысалы, қозғалтқыш көлемі 3 литрге дейінгі автокөліктер үшін салық – 9 АЕК-ке дейін, 3–4 литр аралығында – 15 АЕК, 4 литр және одан жоғары – 117 АЕК.
Сондай-ақ 2025 жыл үшін 3000 текше см-ден жоғары қозғалтқышы бар, 2013 жылғы 31 желтоқсаннан кейін Қазақстанда өндірілген (жасалған немесе жиналған) немесе осы күнге дейін әкелінген «жеңіл көліктерге» салық келесі мөлшерлемелер бойынша есептеледі (Салық кодексінің 492-бабы, 2-тармақ):
- 3 000-нан 3 200 текше см қоса алғанда – 35 АЕК немесе 137 620 теңге;
- 3 200-ден 3 500 текше см қоса алғанда – 46 АЕК немесе 180 872 теңге;
- 3 500-ден 4 000 текше см қоса алғанда – 66 АЕК немесе 259 512 теңге;
- 4 000-нан 5 000 текше см қоса алғанда – 130 АЕК немесе 511 160 теңге;
- 5 000 текше см-ден жоғары – 200 АЕК немесе 786 400 теңге.
«Осылайша, 2025 жылға көлік салығын салық органдары осы тармаққа сәйкес есептейтін болады», – деді КГД.
Басқаша айтқанда, 2025 жылғы кезең үшін көлік салығын қазақстандықтар 2025 жылы қолданыста болатын «ескі» ставкалар бойынша төлейді. Төлеу мерзімі – 2026 жылғы 1 сәуірге дейін. Ал жаңа ережелер 2026 жылдан бастап қолданылады, бірақ жаңартылған ставкалар бойынша төлем 2027 жылғы 1 сәуірге дейін жүргізіледі.