Бизнес нысандары арасында Жаңа жылдық безендіру бойынша байқау өтеді

Жаңа жыл мерекелері қарсаңында Петропавл қаласындағы коммерциялық және қоғамдық нысандар мерекелік орта қалыптастыруға белсенді түрде атсалысуда. Дүкендер, дәмханалар, мейрамханалар, қонақүйлер, кеңселер және өзге де ұйымдар қала тұрғындары мен қонақтарына шынайы жаңа жылдық көңіл күй сыйлау үшін өз ғимараттарының қасбеттері мен ішкі көрінісін безендіруде, деп хабарлайды QZ News тілшісі.

Қала кәсіпкерлері декор жасауға креативті көзқарас танытып отыр. Мәселен, «Весна» флористика студиясы дәстүрлі әшекейлермен шектелмей, суреттерге әуес жандарды тартатын толыққанды мерекелік фото аймақ ұйымдастырды.

Мұндай бастамалар қаланың мерекелік келбетін қалыптастырып қана қоймай, жаңа жыл алдындағы көңіл күйді арттырып, тұрғындарды мерекенің жақындағанын тереңірек сезінуге шақырады.

Еске салайық, Петропавл қаласында бизнес нысандарын ең үздік жаңа жылдық безендіру бойынша жыл сайынғы байқау өткізіледі. Байқауға дүкендер, дәмханалар, мейрамханалар, қонақүйлер, кеңселер және басқа да ұйымдар қатыса алады. Қатысу үшін нысанның қасбетін, сөрелерін, интерьерін немесе іргелес аумағын безендіріп, фотосуреттерді қалалық кәсіпкерлік бөліміне жолдау қажет. Жеңімпаздар бес номинация бойынша анықталады: ШОБ арасындағы ең үздік қасбет безендіру, Ең үздік интерьерлік безендіру, Ең үздік сөре, Ең үздік жарықпен безендіру, Ұлттық стильдегі ең үздік безендіру.