2026 жылы қазақстандықтардың өмірі қалай өзгереді: салықтар, айыппұлдар және төлемдер
2026 жылдан бастап Қазақстанда әрбір қазақстандықтың күнделікті өміріне әсер ететін бірқатар өзгерістер күшіне енеді. Атап айтқанда, мобильді аударымдарды бақылау, жол қозғалысы ережелерін бұзғаны үшін айыппұлдардың өсуі, жылжымайтын мүлікке салық салудың жаңа тәртібі, ҚҚС мөлшерлемесінің көтерілуі және әлеуметтік төлемдердің индексациясы қарастырылған. Бұл туралы QZ NEWS newtimes.kz-ке сілтеме жасап хабарлайды.
Банктер жеке тұлғалардың шоттарындағы қаражат қозғалысы туралы мәліметтерді салық органдарына ұсынатын болады. Тексеруге негіз болатын жағдай — егер үш ай ішінде шотқа 100 және одан да көп әртүрлі жіберушіден жалпы сомасы 1 млн теңгеден асатын тұрақты аударымдар түссе. Ал достар мен туыстардан келетін біржолғы аударымдар бақылауға алынбайды, деп түсіндірді мемлекеттік органдар.
Сондай-ақ жаңа жылдан бастап жол қозғалысы ережелерін бұзғаны үшін айыппұлдар ұлғаяды. Мысалы, жылдамдықты 10–20 км/сағ арттыру, қауіпсіздік белдігін тақпау және көлікті дұрыс қоймау үшін 5 АЕК көлемінде айыппұл салынады — бұл 21 625 теңге. Ал неғұрлым ауыр құқықбұзушылықтар үшін айыппұл 10 АЕКке дейін өсіп, 43 250 теңгені құрайды. Ең жоғары санкциялар өрескел заңбұзушылықтар үшін 216 250 теңгеге дейін жетеді.
Жаңа жылы Қазақстанда жылжымайтын мүлікті сату кезіндегі салық салу ережелері де өзгереді. Тұрғын үйді қайта сату кезінде алынған табысқа салық салынады: егер пәтер 30 млн теңгеге сатып алынып, 35 млн теңгеге сатылса, айырмашылықтағы 5 млн теңгеден 10% салық төлеу қажет болады. 2026 жылы сатып алынған жылжымайтын мүлікті салықсыз сату тек екі жылдан кейін ғана мүмкін болады, ал ертерек сатылған жағдайда 10% немесе 15% мөлшеріндегі прогрессивті ставка қолданылады. Бұл талаптар жылжымайтын мүліктің барлық түріне қатысты.
Бұдан бөлек, қосылған құн салығының мөлшерлемесі 12%-дан 16%-ға дейін көтеріледі, бұл бизнес өкілдерінің алаңдаушылығын тудырды. Мемлекеттік кірістер комитетінде көршілес елдердегі бизнес жүргізу шарттары әлдеқайда тиімді емес екенін, ал Қазақстан аумағында қызмет көрсеткен жағдайда компанияның қай елде тіркелгеніне қарамастан салық төлеу міндетті екенін мәлімдеді.
2026 жылдан бастап зейнетақылар мен әлеуметтік төлемдер 10%-ға индекстеледі. Нәтижесінде ең төменгі зейнетақы 69 мың теңгені, ал базалық зейнетақы 35 596 теңгені құрайды. Балаларға арналған жәрдемақылар сақталады және бұрынғыдай АЕК-ке байланыстырылған күйінде қалады, алайда төлем мөлшері отбасының табысы мен әлеуметтік мәртебесіне қарай айқындалады.