Ғауез Нұрмұхамбетов Тепличное, Прибрежное және Бескөл ауылдарындағы бөгеттердің құрылысын тексерді
Қызылжар ауданының Прибрежное ауылының тұрғындарымен бірге Солтүстік Қазақстан облысының әкімі өңірдегі қорғаныс құрылыстарын қайта жаңғырту барысын тексерді, деп хабарлайды QZ NEWS.
Тепличное, Прибрежное елді мекендері мен Бескөл ауылындағы бөгеттерде құрылыс жұмыстары қарқынды жүргізілуде. Үш қорғаныс нысаны да толықтай бетонмен қапталады. Жобаны қаржыландыру толық көлемде қамтамасыз етілген.
«Сонымен қатар электр беру желілерінің құлауына жол бермеу мақсатында “СҚ ЭЖТК” АҚ темірбетон және металл тіректерді, сондай-ақ мұз кескіш құрылғыларды орнату жұмыстарын жүргізуде. Өтпелі желілер оқшауланған сымдарын қолдану арқылы орындалды, бұл электрмен жабдықтаудың сенімділігі мен қауіпсіздігін айтарлықтай арттырады», – деп жазды СҚО әкімі Ғауез Нұрмұхамбетов әлеуметтік желідегі парақшасында.
Сондай-ақ Прибрежное ауылына апаратын автомобиль жолын көпір салумен бірге қайта жаңғырту жұмыстары басталды. Қыс мезгілінде көпірдің конструкциясын орнату, сондай-ақ топырақты бут тастарымен нығайту жоспарлануда. Негізгі жұмыс көлемі 2026 жылы атқарылады.