«Бүкіл қазақ халқынан кешірім сұраймын»: әкесін өлгенше сабаған ер адам сотта жылап жіберді

Түркістан облысының Жетісай аудандық сотында қария әкесін жиі соққыға жығып келген деп айыпталған ер адамның резонанстық ісі аяқталуға жақын. 15 қаңтарда сотта айыпталушы соңғы сөзін айтты, деп хабарлайды QZ NEWS Tengrinews.kz-ке сілтеме жасап.

Сот отырысы кезінде айыпталушы эмоциясын ұстай алмай, жылап жіберді. Ер адам өз кінәсін толық мойындап, қоғамнан кешірім сұрады.

«Баршаңыздан кешірім сұраймын. Бүкіл қазақ халқынан. Істеген ісіме шын жүректен өкінемін. Туыстардан кешірім сұраймын. Ашуға берілдім. Өмір бойы өкініп өтемін. Қателестім. Барлық мұсылман халқынан кешірім сұраймын. Мені түсініп, кешірулеріңізді өтінемін. Кінәмді толық мойындаймын», – деді сотта ер адам.

Бұған дейін прокурор айыпталушыға 6 жыл 2 ай бас бостандығынан айыру жазасын сұраған.

Іс өткен жылдың қыркүйек айында резонанс тудырған, себебі әлеуметтік желілерде ер адамның әкесін ұрып соққан кадрлар тараған еді. Отбасының көршісі ер адамның қарт әкесін аула ішінде қатал соққыға жығып жатқанын жасырын видеоға түсірген. Кадрларда қарияның қанға боялған беті көрінеді. Ол өздігінен тұра алмаған кезде, ұлы әйелін шақырып, екеуі бірге оны үйге кіргізген.
Содан кейін қарт ер адамның қайтыс болғаны белгілі болды.

Полиция ерлі-зайыптыға қатысты қылмыстық іс қозғаған, алайда әйелге қатысты «Соққы беру» бабымен тергеу дәлелдің болмауына байланысты тоқтатылды.