Полиция 16 жастағы оқушымен болған оқиға бойынша тергеудің барысы туралы түсініктеме берді
Солтүстік Қазақстан облысы Полиция департаменті Айыртау ауданының тұрғыны жасөспірімнің ауруханаға жатқызылған оқиға бойынша сотқа дейінгі тергеудің басталғанын ресми түрде растады, деп хабарлайды QZ News тілшісі.
СҚО ПД хабарлауынша, 16 жастағы қыздың белгісіз сұйықтықтан улану белгілерімен ауруханаға жатқызылғаны туралы хабарлама 4 ақпанда кезекші бөлімге түскен.
«Қазіргі уақытта оқиғаның барлық мән-жайын жан-жақты және объективті анықтауға бағытталған қажетті тергеу іс-шаралары жүргізілуде. Оқиғаның мән-жайы тексеріліп жатыр. Басқа ақпарат заңнамаға сәйкес жарияланбайды», – деп атап өтті ведомствода.
Айта кетейік, Петропавл қаласында дәрігерлер жасөспірімнің өмірін сақтап қалу үшін күресіп жатыр. Гусаковка ауылының 16 жастағы оқушысы ішкі ағзаларының ауыр химиялық күйігін алып, облыс орталығы мамандарының шұғыл араласуын қажет етті.
Оқиға 4 ақпан күні болды. Алдын ала мәлімет бойынша, сабақ кезінде оқушы дәретханаға шығуға рұқсат сұраған. Сол жерде, кабинкаға кіріп, 70 пайыздық сірке қышқылын ішкен. Қатты ауыр халде жатқан қызды мектеп қызметкерлері байқап, дереу жедел медициналық көмек шақырған.
Оқу орнында оқушы тек жағымды қырынан сипатталған, бұған дейін даулы жағдайларға қатыспаған, сабақтарға тұрақты қатысып, қатарластары мен педагогтармен достық қарым-қатынаста болған.