Солтүстік Қазақстан облысында Жаңа Конституция жобасын қолдауға арналған өңірлік коалиция құрылды

Петропавл қаласында «Әділетті және Прогрессивті Қазақстанның Халықтық Конституциясы үшін» атты өңірлік коалиция құрылды. Ол Солтүстік Қазақстан облысындағы қоғамдық-саяси күштердің өкілдерін біріктірді, деп хабарлайды QZ NEWS.

Коалиция құрамына 60 адам енді. Олардың қатарында саяси партиялардың өңірлік филиалдары, мәслихат депутаттары, қоғамдық бірлестіктер, сарапшылар қауымдастығы және жастар ұйымдарының өкілдері бар.
Бірлестіктің негізгі мақсаты – Жаңа Конституция жобасы мен алдағы республикалық референдум бойынша ақпараттық-түсіндіру жұмыстарын үйлестіру.

Коалиция жетекшісі Владимир Бубенко бұл алаң өңір тұрғындарымен ашық диалог форматында жұмыс істейтінін атап өтті.

«Конституция – елдің құқықтық жүйесі мен стратегиялық дамуының негізі. Біздің міндетіміз – ұсынылып отырған өзгерістер туралы азаматтарға түсінікті әрі қолжетімді ақпарат беру, мазмұнды талқылау мен кері байланысқа жағдай жасау», – деді ол.

Жиынға қатысушылар Ата Заң елдің ұзақ мерзімді даму бағдарын айқындайтынын, сондықтан өңірдегі барлық қоғамдық-саяси институттардың күш-жігерін біріктіру әрбір тұрғынға объективті ақпарат жеткізу үшін аса маңызды екенін атап өтті. Бекітілген жұмыс жоспары аясында Коалиция алдағы уақытта көшпелі кездесулер өткізуді бастайды. Іс-шаралар ірі еңбек ұжымдары мен сарапшылар қауымдастығын ғана емес, Солтүстік Қазақстан облысының шалғай ауылдық елді мекендерінің тұрғындарын да қамтиды.