Супермаркетте адамдарды соққыға жыққаны үшін 20 жастағы петропавлдық 1 жыл 6 айға бас бостандығын шектеу жазасына кесілді
2026 жылғы ақпанда Петропавл қалалық соты қоғамдық орында «өзін көрсетуге» тырысқан 20 жастағы жергілікті тұрғынға үкім шығарды, деп хабарлайды QZ NEWS.
Оқиға 2025 жылдың жазында болған. Қалалық супермаркеттердің бірінде мас күйінде жүрген «С» есімді азамат жанжал шығарып, екі келушіге дене жарақатын салған. Сот талқылауының қорытындысы бойынша оған 1 жыл 6 ай мерзімге бас бостандығын шектеу жазасы тағайындалып, пробациялық бақылау белгіленді.
Бұл сот процесі көрсетілімдік сипатта өтті. Петропавл қаласы прокуратурасының бастамасымен сот отырысы тікелей эфирде көрсетіліп, оны облыстағы 20 колледжден 750 студент тамашалады. Мұндай шараның мақсаты – бір сәттік ашудың өмірбаянда соттылық ретінде мәңгілік із қалдыруы мүмкін екенін жастарға нақты көрсету.
«Бұзақылық жасағаны үшін қатаң қылмыстық жауапкершілік көзделген. Біз жастардың құқықтық санасын қалыптастыруға ұмтыламыз. Қоғамдық тәртіпті бұзған әрбір әрекет міндетті түрде жазаға әкеледі», – деп атап өтті қадағалау органында.
Қазіргі уақытта сот үкімі заңды күшіне енген жоқ. Прокуратура азаматтарды заң талаптарын сақтауға және қоғамдық орындарда құқыққа қайшы әрекеттерге жол бермеуге шақырады.