СҚО-да банк 14 миллион теңгелік кепілдегі пәтерге құқығын сот арқылы қайтарды

Солтүстік Қазақстан облысында әкімшілік істер жөніндегі сот алқасы (ӘАСА) заңды құқық иесін айналып өтіп, кепіл мүлкін беруге әрекет жасаған жеке сот орындаушысының іс-әрекеттерін заңсыз деп таныды, деп хабарлайды QZ NEWS.

Дау құны 14 миллион теңгеге бағаланған, банктің кепілінде тұрған пәтер төңірегінде өрбіді. Алғашқы сауда-саттық өтпегеннен кейін жеке сот орындаушысы кепіл ұстаушының мүддесіне қайшы әрекет жасап, мүлікті заңда белгіленген кезектілікті бұза отырып, бесінші кезектегі өндіріп алушы — «N» ЖШС-не берген.

Солтүстік Қазақстан облысының мамандандырылған ауданаралық әкімшілік соты, кейін апелляциялық саты бұл мәселеге нақты құқықтық баға берді. Соттың қорытындысына сәйкес, кепіл ұстаушы мәртебесі банкке өз талаптарын осы мүлік есебінен басымдықпен қанағаттандыру құқығын береді.

Сот мәліметінше, банктің талаптары кепілмен қамтамасыз етілгендіктен, оның басқа өндіріп алушыларға қарағанда басым құқығы бар. Пәтерді «N» ЖШС-не беру заңда белгіленген кезектілікті бұза отырып жүзеге асырылған.
Судьялар банктің мүлікті өзінде қалдыру туралы бірден өтініш бермеуі жеке сот орындаушысына оны өз қалауынша иеленуге немесе үшінші тұлғаларға беруге құқық бермейтінін атап өтті.

Сонымен қатар, банк қайта аукцион өткізуге дайын екенін жазбаша түрде растаған. Бұл жағдай жеке сот орындаушысын заң аясында сату рәсімін жалғастыруға міндеттеген, алайда ол пәтерді өзге ұйымға беруге әрекет жасаған.

Сот талқылауының қорытындысы бойынша жеке сот орындаушысының қаулысы заңсыз деп танылып қана қоймай, Солтүстік Қазақстан облысының Әділет департаменті мен өңірлік жеке сот орындаушылары палатасының атына жеке ұйғарым шығарылды.
Сот өкілдері өкілеттіктерді асыра пайдалануға және қаржы институттарының құқықтарын шектеуге жол берілмейтінін ерекше атап өтті.