СҚО ТЖД мамандары Тимирязев ауданында қар құрсауында қалған жүкті әйел мен екі баланы құтқарды
March 10, 2026 10:07
Солтүстік Қазақстан облысында қысқы табиғат құбылыстары жүргізушілерді әлі де әбігерге салуда. Тимирязево аудан орталығынан 17 шақырым жерде жеңіл автокөлік қалың қарға батып, әрі қарай қозғала алмай қалған, деп хабарлайды QZ NEWS.
Қар құрсауында қалған көліктің ішінде екі баласы бар отбасы болған. Құтқарушыларды әйелдің жүкті екені туралы ақпарат ерекше алаңдатты. Төмен температура мен көріну деңгейінің нашар болуы жағдайды күрделендіріп, кез келген кідіріс ауыр салдарға әкелуі мүмкін еді.
СҚО ТЖД мәліметінше, оқиға орнына құтқарушылар жедел түрде жеткен. Көлік қардан шығарылып, тазартылған жол бөлігіне сүйреп апарылды. Кейін құтқарушылар отбасын Тимирязево ауылына жеткізді. Зардап шеккендер жоқ, медициналық көмек қажет болған жоқ.