SKO Hub тағылымдамашылары қала тұрғындарына арналған интерактивті акция ұйымдастырды
City Mall сауда-ойын-сауық орталығының алаңы бір күнге технологиялық аймаққа айналды. Өңірлік IT-хаб — SKO Hub ұйымдастырған акцияның мақсаты — жасанды интеллекттің (ЖИ) күнделікті өмірімізді қалай өзгертіп жатқанын көрнекі түрде көрсету болды, деп хабарлайды QZ NEWS тілшісі.
Акция барынша ашық әрі жайлы форматта өтті. Қала тұрғындарын жалықтыратын лекциялар емес, керісінше еркін әңгіме мен цифрлық өзара әрекет күтіп тұрды. Ұйымдастырушылар барлық жастағы адамдарды қарапайым әрі түсінікті тәсілдер арқылы тартуға басымдық берді.
Цифрлық әлемге жол көрсетуші ретінде SKO Hub-тың жас мамандары мен тағылымдамашылары қатысты.
«IT-хабтың тағылымдамашылары алаң қонақтарымен еркін әңгімелесіп, шағын сауалнамаларға, цифрлық челлендждер мен ойын тапсырмаларына қатысуды ұсынды.
Басты мақсат — жасанды интеллект туралы қалыптасқан мифтерді сейілтіп, оның бүгінгі күні тұрмысымыздың бір бөлігіне айналған пайдалы құрал екенін көрсету. Біз петропавлдықтарды жоғары технологиялар саласында дамуға шабыттандырғымыз келеді», — дейді SKO Hub өкілдері.
SKO Hub тағылымдамашылары қатысушыларға тапсырмаларды орындауға көмектесіп қана қоймай, қалада сұранысқа ие IT-мамандықтарын қай жерде меңгеруге болатыны туралы да айтып берді.
Алаңдағы барлық белсенділіктер қысқа бейнесюжеттер түсірумен қатар жүргізілді. Қатысушылардың ең жарқын сәттері, әсерлі реакциялары мен цифрлық тәжірибелердің нәтижелері әлеуметтік желілерде жарияланады.