Kozybayev University-дің 35 студенті Қытайдың жетекші аграрлық жоғары оқу орнына оқуға аттанды
Биыл Kozybayev University-дің 35 студенті Қытай Халық Республикасындағы жетекші аграрлық оқу орындарының бірі — Солтүстік-Батыс ауыл және орман шаруашылығы университетіне оқуға жіберілді, деп хабарлайды QZ NEWS тілшісі.
Екі оқу орны арасындағы әріптестік он жылдан астам уақыт бойы табысты дамып келеді және «Бір белдеу – бір жол» халықаралық бастамасы аясында жүзеге асырылуда. Осы уақыт ішінде ынтымақтастық академиялық ұтқырлықты, ғылыми зерттеулерді және оқытушылардың біліктілігін арттыруды қамтитын кешенді әрі тұрақты сипатқа ие болды.
Өзара іс-қимылдың негізгі бағыттарының бірі — студенттердің академиялық ұтқырлығы. Ынтымақтастық жылдарында Қытайдан 90 студент Kozybayev University-де білім алса, Қазақстаннан 30 студент қытайлық жоғары оқу орнында оқу мүмкіндігіне ие болды.
Биылғы жолдама ең ауқымды сапарлардың бірі болды: бірден 35 студент Қытайға білімін жалғастыру үшін аттанды.
Топ құрамында 33 бакалавриат студенті бар. Олар «Агрономия», «Мал шаруашылығы өнімдерін өндіру технологиясы», сондай-ақ өсімдіктер туралы ғылым және агротехнологиялар бағыттары бойынша білім алады. Сонымен қатар, екі магистрант қос диплом бағдарламалары бойынша оқуын бастап кетті. Бұл бағдарлама аясында олар алғашқы жарты жылды Петропавлда өткізіп, қалған бір жарым жылын Қытайда білім алып, ғылыми жұмыстармен айналысады. Оқу аяқталғаннан кейін түлектер қазақстандық және қытайлық үлгідегі екі дипломға ие болады.
Университеттер арасындағы ынтымақтастық тек студент алмасумен шектелмейді. Қазіргі таңда Kozybayev University агротехнологиялық факультетінің үш жас оқытушысы Қытай жоғары оқу орнында докторантурада білім алуда, ал тағы екеуі ғылыми тағылымдамадан өтуде.
Сонымен қатар, мамандарды тәжірибеге бағыттап даярлауға ерекше көңіл бөлінеді: жыл сайын Қытайда мал шаруашылығының заманауи технологиялары бойынша тренингтер ұйымдастырылып, оған Солтүстік Қазақстан облысынан оқытушылар, фермерлер және салалық мемлекеттік құрылым өкілдері қатысады.
Алдағы уақытта бұл ынтымақтастық одан әрі кеңейе түседі деп күтілуде. Сәуір айының соңында Петропавлға қытайлық университеттің жеті студенті келмек, ал күзгі семестрде тағы шамамен 30 студенттің келуі жоспарланып отыр. Бұл екі ел арасындағы академиялық байланысты нығайтып, білім мен тәжірибе алмасуға жаңа мүмкіндіктер ашады.