Петропавлда өткен халықаралық форумда Танзания мен Қырғызстан сарапшылары ағылшын тілінің болашағын талқылады

Петропавл қаласында «The Resilient Educator: Digitalization of Modern Methodology, and Continuous Growth in ELT» / «Тұрақты педагог: заманауи әдістемені цифрландыру және ағылшын тілін оқытудағы үздіксіз даму» атты ағылшын тілі мұғалімдерінің халықаралық форумы өтті, деп хабарлайды QZ NEWS тілшісі.

Форум №28 мектеп базасында ұйымдастырылып, оған педагогтер, әдіскерлер, жоғары оқу орындарының оқытушылары, зерттеушілер, сондай-ақ Қырғыз Республикасы мен Танзаниядан келген халықаралық сарапшылар қатысты.

Іс-шараны «Өрлеу» БАҰО» АҚ-ның «СҚО бойынша Кәсіби даму институты» филиалы ұйымдастырды. Негізгі мақсат — ағылшын тілін оқытудың заманауи әдістемесін цифрландыруды талқылауға, білім беру үдерісіне жасанды интеллект енгізуге және жаһандық өзгерістер жағдайында педагогтердің тұрақтылығын арттыруға арналған халықаралық кәсіби алаң қалыптастыру.

Пленарлық отырыста қатысушылар білім беру үдерісін цифрландыруды басқару, мұғалімдердің құзыреттерін арттыру, оқытуды онлайн ортада оқушылардың қажеттіліктеріне бейімдеу, адамға бағытталған жасанды интеллектті енгізу және әлеуметтік-эмоционалдық оқыту мәселелерін қарастырды.

Сонымен қатар Task-Based Learning модельдеріне және заманауи цифрлық құралдарды қолдануға ерекше назар аударылды.

Форумның практикалық бөлігі секциялық отырыстар форматында өтті. Онда педагогтер шеберлік сабақтарына қатысып, тәжірибеге бағытталған кейстермен танысты. Бағдарлама аясында сөйлеу дағдыларын дамыту құралы ретінде креативті дубляж, жазба тілін қалыптастыруға арналған цифрлық микро-белсенділіктер мен мемдер, цифрлық лексикалық құралдарды пайдалану, оқытуды саралау үшін жасанды интеллектті қолдану, сондай-ақ балаға бағытталған оқытуда дербестендірілген кері байланыс беру сияқты бағыттар ұсынылды.

Форум қорытындысы бойынша барлық қатысушыларға сертификаттар табысталып, үздік тәжірибелер Солтүстік Қазақстан облысының білім беру ұйымдарында енгізуге ұсынылды.