СҚО-да су тасқынына дайындық AMANAT партиясы жанындағы отырыста қаралды
Солтүстік Қазақстан облысында су тасқыны кезеңіне дайындық күшейтілген режимде жүргізілуде, деп хабарлайды QZ NEWS тілшісі.
Өңірдегі өзекті жағдай мен қабылданып жатқан шаралар кешені AMANAT партиясының облыстық филиалы жанындағы партиялық бақылау комиссиясы мен өңірлік даму кеңесінің отырысында талқыланды. Өңірде су басу қаупі бар аумақтарға ерекше назар аударылуда. Осындай осал елді мекендердің бірі – Петропавлдағы Заречный кенті. Мұнда алты көпқабатты тұрғын үй мен 90-ға жуық жеке үй орналасқан. Қауіпсіздікті қамтамасыз ету мақсатында тұрғындарды көшіру туралы шешім қабылданып, бүгінде 90 отбасы қауіпсіз аймақтарға орналастырылды.
Сонымен қатар облыстық бюджет есебінен 72 және 90 пәтерлік жаңа тұрғын үйлердің құрылысы жүргізілуде. Алдын алу шаралары Есіл өзенінде де қолға алынған. Мұнда мұз кептелістерінің алдын алу үшін жару жұмыстары жүргізілді. Бұл өзен арнасының өткізу қабілетін арттырып, су басу қаупін төмендетуге мүмкіндік береді. Облыс орталығында эвакуация жүйесінің дайындығы да қамтамасыз етілген. Уақытша орналастыру пункттері мектептер мен жатақханалар базасында ашылып, қажетті жабдықтармен қамтамасыз етілген.
Айтарлықтай жұмыс көлемі Қызылжар ауданында атқарылуда. Мұнда 18 елді мекен су басу қаупі бар аймақта орналасқан. Су тасқынына қарсы шараларды іске асыруға 12,4 млрд теңге бөлінген. Қорғаныс бөгеттерін қайта жаңарту, жол инфрақұрылымын жаңғырту және су бұру жүйелерін салу жұмыстары жүргізілуде.
Аудан әкімінің орынбасары Бахтияр Бекеновтің айтуынша, жұмыстар жоспарлы түрде атқарылып жатыр.
«Қыс мезгілінде 199 мың текше метр қар шығарылды, жүздеген су өткізу құбырлары тазартылды. Тек соңғы бір аптада 9 мың текше метр еріген су сорылып шығарылды. 150-ден астам арнайы техника және 33 эвакуациялық пункт дайындалды. Халықты дер кезінде хабардар ету үшін сиреналар мен дауыс зорайтқыш орнатылған дрондар қолданылады. Сонымен қатар қауіпті учаскелерде бір ай бойы жұмыс істейтін 50 құтқарушы тартылды», — деді Бахтияр Бекенов.
Мамандардың бағалауынша, өңірдегі барлық қызметтер толық дайындыққа келтірілген және ықтимал қауіп-қатерлерге жедел әрекет етуге қабілетті.