Наурыз мерекесінде СҚО полициясы жеті баланы тауып, ата-анасына тапсырды
Солтүстік Қазақстан облысында ұзақ мерекелік демалыс күндері тұрақты жедел жағдайда өтті. Патрульдік қызметтер, учаскелік инспекторлар және басқа бөлімшелердің қызметкерлерінің күшейтілген жұмысының арқасында көпшілік мерекелік шаралар өтетін жерлерде қоғамдық тәртіптің қатты бұзылуы тіркелген жоқ, деп хабарлайды QZ NEWS тілшісі.
СҚО ПД баспасөз қызметінің хабарлауынша, Петропавлда мереке күні көпшілік арасында балалардың адасу оқиғалары көп болды. Тек 22 наурызда полиция бөлімшелері жеті рет балаларды іздеп тауып, ата-анасына тапсырған. Сонымен қатар, Былғары зауыты ауданының полиция қызметкерлері серуенде ойнап жүрген және уақытында үйіне оралмаған үшінші сынып оқушысын жедел тауып алды. Көбінесе осы күндері тұрғындар полицияға отбасындағы даулар (49 факт) және түнгі уақытта тыныштықты бұзу (21 факт) себептерімен жүгінген. Сонымен қатар, полицейлер қоғамдық орындарда мас күйде жүрген 12 фактіге жол бермеді.