Петропавл орталығында дрифт жасаған 18 жастағы BMW жүргізушісі ұсталды
Петропавлда жүргізушінің қоғамдық тәртіпті өрескел бұзуының кезекті дерегі тіркелді. Оқиға 11 сәуірге қараған түні болып, қала тұрғындарының алаңдаушылығын тудырды, деп хабарлайды QZ NEWS тілшісі.
Түнгі сағат үш шамасында полицияға қала тұрғындарынан бірнеше қоңырау түскен. Олар Қазақстан Конституциясы көшесіндегі супермаркеттердің бірінің маңында BMW көлігін басқарған белгісіз жүргізуші қауіпті маневрлер жасап, тыныштықты бұзып, айналадағы адамдарға қауіп төндіріп жатқанын хабарлаған.
Құқық қорғау органдарының мәліметінше, жүргізуші жаяу жүргіншілер аймағында экстремалды жүргізу элементтерін көрсеткен. Оның әрекеттері бейнебақылау камераларына да, оқиға куәгерлерінің ұялы телефонға түсірген видеоларына да жазылып алынған.
Полиция қызметкерлері тәртіп бұзушының жеке басын жедел анықтады. Ол облыс орталығының 18 жастағы тұрғыны болып шықты. Жас жігіт ұсталып, уақытша ұстау изоляторына қамалды.
Қалалық полиция басқармасының бастығы Серік Әлжановтың айтуынша, құқық бұзушыға қатысты әкімшілік материалдар толтырылған. Іс сотқа жолданып, 13 сәуір күні ол сот алдында жауап берді.
Жалпы, жүргізуші Қазақстан Республикасының Әкімшілік құқық бұзушылық туралы кодексінің бірнеше бабы бойынша жауапкершілікке тартылды. Атап айтқанда, авариялық жағдай туындату, маневр жасау ережелерін бұзу, түнгі уақытта тыныштықты бұзу және ұсақ бұзақылық.
Полиция өкілдері мұндай әрекеттер азаматтардың қауіпсіздігіне нақты қауіп төндіретінін және тұрғындардың тыныш демалу құқығын бұзатынын атап өтті. Тәртіп сақшылары жүргізушілерді жол қозғалысы ережелерін қатаң сақтауға және айналадағы адамдарға құрметпен қарауға шақырады.