Мас күйде болған Тайынша тұрғыны әріптесінің көлігін айдап кетіп, сәтсіз сапардан кейін тастап кеткен

Тайынша қаласында полицейлер жәбірленушінің мас күйдегі әріптесі жасаған автокөлік ұрлау дерегін ашты. Оқиға «ВАЗ 2110» көлігінің иесі көлікті ашық қалдырып, кілтін оталдыру тетігінде қалдырғаннан кейін болған, деп хабарлайды QZ NEWS тілшісі.

Иесінің салғырттығын пайдаланған 30 жастағы ер адам көлікпен жүріп қайтпақ болған, алайда сапары ұзаққа созылмаған. Мас күйде болған күдікті рөлге ие бола алмай, көлікті жол жиегіне тастап кеткен.
Полиция қызметкерлері күдіктіні сол күні ұстады. Анықталғандай, ол жәбірленушімен бірге жұмыс істеген. Тәртіп сақшылары өңір тұрғындарына қарапайым қауіпсіздік шараларын сақтауды еске салады және көлікті қысқа уақытқа болса да ашық қалдырмауға, кілтті ішінде қалдырмауға кеңес береді.

Полицейлердің мәліметінше, жыл басынан бері облыста автокөлікті заңсыз иеленудің 12 дерегі тіркелген, олардың барлығы ашылған.
Талдау көрсеткендей, бұл қылмыстардың барлығы тұрмыстық сипатта болып, алкогольдік масаң күйде жасалған. Барлық жағдайда көлік иелері өздері ұрлыққа жағдай жасаған: көліктерін құлыптамай қалдырып, кілттерін оталдыру тетігінде қалдырған.

«17–30 сәуір аралығында облыста «Стоп угон» жедел-профилактикалық іс-шарасы өткізілуде. Халықпен түсіндіру жұмыстары күшейтілді. Аула аумақтарына, бейнебақылауды дамытуға және есепте тұрған тұлғалармен жеке жұмысқа ерекше назар аударылуда.

Полицияның басты мақсаты – жазалау емес, қылмыстың алдын алу. Бұл көп жағдайда көлік иелерінің өзіне байланысты: қарапайым қауіпсіздік шаралары автокөлік ұрлау қаупін нөлге дейін төмендете алады», – деп атап өтті СҚО ПД өкілдері.