Петропавлда жедел жәрдемнің екі бригадасы тасымалдау кезінде жүрегі тоқтап қалған науқасты құтқарып қалды
Петропавлда жедел жәрдем дәрігерлері ауыр миокард инфарктімен түскен 63 жастағы науқасқа сәтті реанимация жасады. 9 сәуір күні күндіз 103 пультіне шақырту түскен, деп хабарлайды QZ NEWS тілшісі.
2-санат бойынша шақыртуға фельдшерлік жедел жәрдем бригадасы шықты: Мария Селянина, Артём Штейдле және жүргізуші Айтола Ахметов.
«Жедел жәрдем бригадасы келген кезде науқастың жағдайы аса ауыр болды: бір сағат бойы іштің жоғарғы бөлігінде күйдіріп ауырсыну, бірнеше рет құсу, артериялық қысымның өте төмен болуы, жүрек соғысының сиреуі және пульстің әлсіздігі байқалды. ЭКГ түсірілгеннен кейін трансмуралды миокард инфаркті, кардиогендік шокпен және толық АВ-блокадамен асқынған деген диагноз қойылды. Жағдайының ауырлығына байланысты қосымша дәрігерлік бригада шақырылды. Көмек ST сегментінің көтерілуімен өтетін жедел коронарлық синдромы бар науқастарды емдеу хаттамасына сәйкес көрсетілді. Көрсетілген көмектің нәтижесінде жағдайы аздап жақсарды», – делінген СҚО жедел жәрдем қызметінің хабарламасында.
Көмекке мамандандырылған дәрігерлік жедел жәрдем бригадасы келді: Дастан Оразаев, Алексей Макиш және жүргізуші-парамедик Нұрлан Тогайбаев.
Ауруханаға жеткізу барысында науқастың қан айналымы тоқтап қалды.
«Дереу ACLS стандарттарына сәйкес реанимациялық шаралар басталды – минутына 100–120 қысым жиілігімен кеуде қуысына жанама массаж үздіксіз жүргізілді, дефибриллятордың 200 Дж разряды берілді, әрі қарай реанимация жалғасты: кеуде массажы және Амбу қапшығы арқылы 30/2 қатынасында жасанды тыныс алдыру. 2 минуттан кейін өздігінен қан айналымы қалпына келді: ірі артерияларда пульсация пайда болды, өздігінен тыныс алу қалыптасты, есі анықталды.
Вазопрессорлық қолдаумен науқас арнайы көмек көрсету үшін Кардиологиялық орталыққа жеткізілді», – деп толықтырды медицина қызметкерлері.
Қазіргі таңда ер адамның өміріне қауіп жоқ. Жедел медициналық жәрдем орталығы қызметкерлерінің жоғары нәтижелі жұмысы шұғыл көмек көрсетудің әлемдік стандарттары бойынша тұрақты оқытудың арқасында мүмкін болды.