BioOperations зауыты қазақстандық БИ-95 жаңа бензинін өндіруге қажетті негізгі компонентті шығарады
Қазақстанда биоэтанол қосылған жаңа автомобиль отыны – БИ-95 өнеркәсіптік өндірісі басталды, деп хабарлайды QZ NEWS тілшісі. Жобаның негізгі буыны Солтүстік Қазақстан облысында шоғырланған, мұнда отын өндіруге қажетті басты компонент – биоэтанол шығарылады.
ҚР Ауыл шаруашылығы министрлігінің мәліметінше, жоба KazFoodProducts холдингі арқылы жүзеге асырылып, ауыл шаруашылығы шикізатын терең өңдеу негізінде отын өнімін нарыққа шығарудың еліміздегі алғашқы үлгісіне айналды. Айта кету керек, жанармайдың өзі өңірде өндірілмейді: Солтүстік Қазақстан облысының кәсіпорындары биоэтанол шығарып, кейін ол дайын өнімді жасауға пайдаланылады.
Биоэтанол BioOperations зауытында өндіріледі – бұл республикадағы осындай деңгейдегі жалғыз кешен. Мұнда бидай терең өңдеуден өтіп, жоғары қосылған құны бар өнімге айналады. Кейін биоэтанол басқа өндіріс орындарына жеткізіліп, BioPetrolCompany базасында БИ-95 отыны дайындалады.
БИ-95 – құрамында 5–10% биоэтанол бар бензин. Мұндай қоспа отынның октан саны сияқты негізгі сипаттамаларын сақтай отырып, экологиялық тұрғыдан анағұрлым тиімді болып саналады.
Биоэтанол қайта өңделген өсімдік шикізатынан алынатындықтан, көміртегі тұрғысынан бейтарап компонентке жатады.
Әзірлеушілердің бағалауынша, биоэтанол қосылған отынды пайдалану ұсақ бөлшектер шығарындыларын 70%-дан астамға, азот оксидтерін 25%-ға, ал парниктік газдар көлемін 60–70%-ға дейін азайтуға мүмкіндік береді (АИ-92 бензинімен салыстырғанда).
Мұндай тәжірибе әлемде кеңінен қолданылады: Еуропа елдерінде, АҚШ-та және Жапонияда биоэтанол қосылған отын бірнеше онжылдық бойы пайдаланылады. Қазақстан да бұл жүйеге кезең-кезеңімен кірігуде. 2022 жылдан бері BioOperations кәсіпорнының өнімі Еуропалық одақ елдері мен Ұлыбританияға экспортталып келеді, бұл оның халықаралық стандарттарға сай екенін көрсетеді.
Сондай-ақ БИ-95 отынын пайдалану автокөлікті жаңғыртуды қажет етпейтіні атап өтілді. Ол бензинмен жүретін қозғалтқыштардың басым бөлігіне сәйкес келеді және олардың жұмыс көрсеткіштеріне әсер етпейді. Сынақтар қозғалтқыш қуатының сақталатынын және зиянды шығарындылардың азаятынын көрсетті. Жоба жетекшісі Лаура Бергибаева жаңа өнімді іске қосу стратегиялық маңызға ие екенін атап өтті:
«БИ-95-ті іске қосу – ең алдымен экологиялық қадам. Бұл тек жаңа отын түрі емес, қоршаған ортаға түсетін жүктемені азайту. Биоэтанолды қолдану шығарындыларды едәуір қысқартуға мүмкіндік береді. Сонымен қатар бұл – ел ішінде терең өңдеуді дамыту және экология мен экономиканы үйлестіретін тұрақты модель қалыптастыру жолындағы маңызды қадам», — деді ол.