СҚО полицейлері Петропавл студенттері мен еріктілеріне қызметтік иттердің жұмыс ерекшелігін көрсетті
Кинологиялық қызмет орталығының базасында студенттерге, еріктілерге және қаланың белсенді жастарына арналған танымдық кездесу өтті. Экскурсияға қатысушылар кинологтардың күнделікті жұмысының ерекшелігімен танысып, қызметтік иттердің қылмыстарды ашудағы және қоғамдық қауіпсіздікті қамтамасыз етудегі үлесі туралы білді, деп хабарлайды QZ NEWS тілшісі.
Іс-шараның бастамашысы – СҚО Ішкі саясат басқармасының қолдауымен Қоғамдық даму және ақпарат орталығының жастар бастамалары бөлімі. Кездесудің негізгі мақсаты – жастар арасында заңға құрмет қалыптастыру және қоғамдық қауіпсіздікті қамтамасыз етудегі қызметтік иттердің маңызды рөлін таныстыру болды. Экскурсия кіріспе бөлімнен басталып, онда қатысушыларға кинологиялық қызметтің ерекшеліктері түсіндірілді. Жастар қызметтік иттердің қалай дайындалатынын, қандай міндеттер атқаратынын және олардың қылмыстарды ашу мен құқықтық тәртіпті сақтаудағы маңызын білді.
Іс-шара ұйымдастырушысы, Қоғамдық даму және ақпарат орталығы жастар бастамалары бөлімінің кеңесші-сарапшысы Бибігүл Сұлтанованың айтуынша, мұндай кездесулер жастар мен құқық қорғау органдары арасындағы байланысты нығайтады:
«Біздің мақсатымыз – тек айту емес, қауіпсіздікті қамтамасыз ету жүйесінің қалай жұмыс істейтінін ішкі жағынан көрсету. Осындай форматтар арқылы жастарда заңға деген саналы көзқарас және әр азаматтың жауапкершілігін түсіну қалыптасады. Жастардың қызығушылығы жоғары, бұл – өте маңызды», – деді Бибігүл Сұлтанова.
Қатысушылардың ерекше қызығушылығын қызметтік иттердің көрсетілімдері тудырды. Кинологтардың жетекшілігімен олар тыйым салынған заттарды іздеу, шартты құқық бұзушыны ұстау және түрлі командаларды орындау дағдыларын көрсетті. Көптеген студенттер үшін бұл кинологиялық қызмет жұмысымен алғаш рет жақын танысу мүмкіндігі болды.
СҚО ПД Кинологиялық қызмет орталығының бастығы Самат Төлебаев төрт аяқты көмекшілердің полиция қызметіндегі маңызын атап өтті:
«Қызметтік иттер – қылмыстарды ашуға, жоғалған адамдарды іздеуге және қауіпсіздікті қамтамасыз етуге күн сайын көмектесетін толыққанды қызметкерлер. Оларды даярлау уақытты, шыдамдылықты және кәсібилікті талап етеді. Жастар бұл еңбектің құндылығын түсініп, полиция қызметкерлері мен біздің серіктеріміздің еңбегін құрметтеуі маңызды», – деді Самат Төлебаев.
Экскурсия барысында қатысушылар мамандарға сұрақтар қойып, құқық қорғау органдарына қойылатын талаптар туралы білді, сондай-ақ бағдарламаның интерактивті бөлімінде кинологтардың көмекшісі рөлін байқап көруге мүмкіндік алды.
Ұйымдастырушылардың айтуынша, мұндай іс-шаралар құқықтық сауаттылықты арттырумен қатар, азаматтық жауапкершілікті қалыптастыруға ықпал етеді. Бұл «Заң және тәртіп» қағидаттарын іске асыру аясында ерекше маңызды.