Петропавлдық майдангер Владимир Тенешевтің жауынгерлік жолы
9 мамыр күні Тенешевтер әулетінде ең сүйікті мерекелердің бірі аталып өтеді. Бұл күні дастарқан басына әрдайым көптеген қонақ жиналады, деп хабарлайды QZ NEWS тілшісі.
Ал шаңырақ иесі Владимир Тенешев көзі тірі кезінде бұл үйге Қазақстаннан көшіп келгеннен кейін 50 жылдан астам өмір сүрген Анапа қаласының жартысына жуығы келетін. Оны көптеген көнекөз тұрғындар жақсы біледі әрі құрметпен еске алады. Қонақжай үй иесі, тамаша аспаз және өз ісінің шебері ретінде танылған ол «Золотой пляж» мейрамханасында 20 жылдан астам қойма меңгерушісі болып еңбек етіп, кейін «Анапа» мейрамханасы директорының орынбасары қызметін атқарған. Үйде қатал әке әрі талапшыл жар болды. Жұбайынан мінсіз тазалықты, ұлдарынан тәртіпті талап ететін.
Владимир Борисович бір қолынан соғыс жылдары айырылды. Ол 1942 жылы өмірінің жартысын өткізген Петропавлдан майданға аттанды. 1943 жылы ауыр жараланып, қолын кесуге тура келген. Сол сұрапыл шайқасты бүгінде алыстағы Қазақстандағы анасына жолдаған жеделхат еске салады.
Онда 19 жастағы Володя жақындарын қорқытпас үшін сол қолынан жеңіл жараланғанын жазған. Оқ тескен мұқаба сол бір сұрапыл күндердің үнсіз куәсіндей сақталып қалған. Бұл жәдігер мен жеделхат бүгінде ұлы Фаридтің отбасында көздің қарашығындай сақтаулы. Соғыстан кейін екі жылдан соң Владимир Тенешев болашақ жары Камария Шариповнамен танысады.
Ұлы Фаридтің айтуынша, әкесі жұбайын өзінің «оң қолым» деп атайтын. Бір қолымен істей алмаған ісін Камария көмектесіп атқарған. Дегенмен Владимир Борисовичтің өзі де көп іске епті болған. Сылақ жасап, кірпіш қалап, балтамен де шебер жұмыс істеген. Өз қолымен өмір бойы тұрған үйін салған. Камариямен бірге 67 жыл отасып, 3 ұл тәрбиелеп өсірді, 7 немере мен 11 шөбере сүйді. Ұлдарының бірі Фарид пен келіні Фатима ата-аналарының есімін мәңгі есте қалдыруды ұйғарып, үй қоршауына естелік тақта орнатқан. Қазір оның жанынан бірде-бір анапалық бейжай өтпейді.
Ардагерлер туралы осындай естелік барда, еліміздің тарихы да әр көшеде, әр шаңырақта өмір сүре береді.