Жыл басынан бері СҚО-да 700-ден астам жұп некесін ресми тіркеді
Жыл сайын 15 мамырда БҰҰ бастамасымен бекітілген Халықаралық отбасы күні аталып өтеді. Осы датаға орай «Азаматтарға арналған үкімет» КЕАҚ филиалы өңірдегі демографиялық ахуалға қатысты мәліметтерді жариялады. 2025 жылы облыста 4 675 неке тіркелсе, 2026 жылдың басынан бері тағы 750 жұп өз қарым-қатынасын ресми түрде заңдастырған, деп хабарлайды QZ NEWS тілшісі.
Дәстүр бойынша ең көп неке Петропавл қаласында тіркелген. Ал облыс аудандары арасында Айыртау, Тайынша және Ғабит Мүсірепов атындағы аудандар алдыңғы қатарда. Сонымен қатар туу көрсеткішінде де оң динамика байқалады: 2025 жылы өңірде 4 684 сәби дүниеге келген. Ал биылғы жылдың қаңтар айынан бастап тағы 1 389 нәрестенің дүниеге келгені тіркелді.
Көптеген жұптар үйлену тойына есте қаларлық күндерді таңдауды жөн көреді. 2026 жылы жас жұбайлардың ерекше қызығушылығын 26 маусым күні — 26.06.26 датасы тудырып отыр.
«Еске саламыз, некені тіркеу үшін өтінішті таңдалған күннен кемінде 15 күн бұрын беру қажет. Өтінішті АХАТ бөлімдері арқылы немесе электрондық үкімет порталы мен екінші деңгейлі банктердің мобильді қосымшалары арқылы тапсыруға болады. Электронды форматтағы қызмет тек Қазақстан Республикасы азаматтарына қолжетімді, ал тіркеу бөлімдері арқылы барлық азаматтар өтініш бере алады», — деп атап өтті Солтүстік Қазақстан облысы бойынша «Азаматтарға арналған үкімет» мемлекеттік корпорациясы КЕАҚ филиалында.
Сонымен қатар азаматтар ақылы негізде салтанатты неке қию рәсіміне де тапсырыс бере алады.