СҚО-да ауыл тұрғынынан тіркелмеген қару-жарақ қоры мен қолдан жасалған граната тәркіленді
Солтүстік Қазақстан облысының аудандарының бірінде полиция қызметкерлері тыйым салынған заттарды заңсыз сақтау фактісін анықтады. 61 жастағы жергілікті тұрғынның үйінен «ТОЗ-34» қос ұңғылы мылтығының кесілген нұсқасы, қолдан жасалған дүмі бар аңшылық мылтықтың ұңғы қорабы, оқ дәрі гильзалары, патрондарды престеуге арналған құралдар, сондай-ақ қолдан жасалған жарық-дыбыстық граната табылды, деп хабарлайды QZ NEWS тілшісі.
СҚО Полиция департаментінің мәліметінше, ер адам 2005 жылға дейін ресми түрде аңшылық билетінің иесі болған. Тәртіп сақшыларына ауыл тұрғыны кесілген мылтықты өз үйінің шатырынан кездейсоқ тапқанын, қару бөлшектерін қоқыс орнынан жинағанын, ал қауіпті жарылғыш құрылғыны мерекелік отшашудың орнына пайдалануды жоспарлап, өзі жасағанын айтқан. Қару мен оқ-дәрілерді заңсыз сақтау фактісі бойынша қылмыстық іс қозғалды.
Аталған дерек криминогендік жағдайды жақсартуға бағытталған облыстық «Қару» жедел-профилактикалық іс-шарасы барысында анықталды.
«Мамыр айының соңында жүргізілген рейдтер кезінде полицейлер 260 үй шаруашылығын, шаруа қожалықтарын және жайылымдық учаскелерді тексерді. Заңсыз айналымнан 11 бірлік атыс қаруы мен 32 патрон тәркіленді. Жалпы жыл басынан бері Солтүстік Қазақстан облысында 59 бірлік қару, оның ішінде алты ойық ұңғылы қару және үш кесілген мылтық тәркіленді. Жүйелі жұмыс қоғамдық қауіпсіздікті нығайтуға және құқық бұзушылықтардың алдын алуға бағытталған», – деп хабарлады ведомство өкілдері.