СҚО-да ересектерге арналған бес күндік тіл үйрену лагері ашылды
Солтүстік Қазақстан облысында ересектерге арналған ерекше білім беру жобасы бастау алды. «Малиновка» демалыс базасында бес күндік күндізгі тіл үйрену лагері өз жұмысын бастады. Оған өңірдегі түрлі этнос өкілдерінен құралған 18 жастан асқан азаматтар қатысуда, деп хабарлайды QZ NEWS тілшісі.
Жобаның басты мақсаты – тыңдаушыларға мемлекеттік тілді табиғи тілдік ортада меңгеруге көмектесу және қазақ халқының ұлттық мәдениеті мен дәстүрлерімен таныстыру.
Бес күн бойы 20 қатысушы үздіксіз тілдік қарым-қатынас атмосферасына енеді. Күн сайынғы сабақтар таңғы сағат 09:00-ден кешкі 17:00-ге дейін өтеді. Бағдарламаға қазақ тілін оқытудың 30 академиялық сағаты және ұлттық бағыттағы шеберлік сабақтарының 10 сағаты енгізілген.
Оқыту үдерісі, ең алдымен, сөйлеу дағдыларын дамытуға бағытталған заманауи әдістемелер негізінде құрылған. Ұйымдастырушылардың айтуынша, дәл осындай еркін қарым-қатынас тілдік кедергіні жылдам еңсеруге және мемлекеттік тілді күнделікті өмірде сенімді қолдануға мүмкіндік береді.
Тіл курстарымен қатар, қатысушыларды мазмұнды мәдени бағдарлама күтеді. Олар бейнематериалдар арқылы Қазақстанның тарихи көрікті орындарымен танысады, ұлттық тағамдарды дайындау бойынша шеберлік сабақтарына қатысады, сондай-ақ ашық аспан астында қазақтың дәстүрлі ойындарын ойнап көреді.
СҚО мәдениет, тілдерді дамыту және архив ісі басқармасына қарасты Тілдерді оқыту орталығының жетекшісі Үмітжан Шынтемірованың айтуынша, жоба тек тілді үйретуге ғана емес, түрлі этнос өкілдері арасындағы өзара түсіністікті нығайтуға да бағытталған.
«Біздің мақсатымыз – қазақ тілін үйренуді қызықты, тәжірибелік тұрғыдан пайдалы әрі қолжетімді ету. Лагерьде қатысушылар грамматиканы ғана оқып қоймай, тілді күнделікті қарым-қатынаста қолданады, қазақ халқының мәдениетімен, дәстүрлерімен және құндылықтарымен танысады. Мұндай формат мемлекеттік тілді одан әрі меңгеруге деген ынтаны арттырып, оның күнделікті өмірдегі қолдану аясын кеңейтеді деп сенеміз», – деді ол.
Курс соңында әрбір қатысушыға арнайы сертификат табысталады.