Қанат Ысқақов СҚО креаторларын нарық сұранысына бағдарлануға шақырды
Солтүстік Қазақстан облысына жұмыс сапары аясында ҚР Мәдениет және ақпарат министрінің бірінші орынбасары Қанат Ысқақов қала тұрғындарымен ашық кездесу өткізді. Кездесу барысында ол ведомствоның негізгі стратегиялық міндеттері – білім культін қалыптастыру, жастарды қолдау және шығармашылық жобаларды коммерцияландыру мәселелеріне кеңінен тоқталды, деп хабарлайды QZ NEWS тілшісі.
Вице-министр Мемлекет басшысының оқитын ұлт қалыптастыру жөніндегі тапсырмасын жүзеге асыруға ерекше назар аударды. Қанат Ысқақов әлеуметтік желілер мен жасанды интеллект технологиялары қарқынды дамып жатқан кезеңде де кітаптың зияткерлік тұрғыдан дамыған қоғам қалыптастырудағы басты негіз болып қала беретінін атап өтті.
– Қазір көпшілік нейрожелілер мен түрлі цифрлық құралдарды пайдаланып жатыр. Дегенмен кітап оқу – интеллектуалдық өсудің негізгі қағидаты. Мемлекет бұл саланы кітап шығаруды қолдау, кітапхана қорларын жаңғырту және жастардың әдебиетке қолжетімділігін арттыру үшін қаржыландыру көлемін ұлғайту арқылы әрі қарай дамыта береді. Сәуір айында өткен Кітап күні өскелең ұрпақтың бұл бағытқа қызығушылығы жоғары екенін көрсетті. Қазіргі жастар кітап оқымайды деген пікір шындыққа жанаспайды. Бізде кітапқа құмар жастар өте көп. Бұл ретте мектептер мен колледждердің педагогтері жастардың кітапқа деген сүйіспеншілігін қалыптастыруда үлкен рөл атқарып отыр, – деді Қанат Ысқақов.
Сондай-ақ ол креативті индустрияны дамыту мәселесіне де тоқталды. Оның айтуынша, әдемі атаулар мен сәнді терминдер нақты нәтиже мен сұраныс болмаса, тиімділік әкелмейді.
– Дамудың негізгі тіректерінің бірі – креативті экономика. Біз қазір тамаша креативті хабта отырмыз. «Креативті» сөзі бүгінде өте танымал. Бірақ ең маңыздысы – нарықтық бағыт. Әріптестеріміз жастарға арналған креативті жобалардың нақты сұранысқа ие болуына жұмыс істеуде. Өнімдер нарықта да, мемлекеттік секторда да қажет болған жағдайда ғана олардың тиімділігі артады. Сондықтан бұл жерде басты назар коммерцияландыруға аударылуы тиіс, – деді бірінші вице-министр.
Қанат Ысқақов жастар және отбасы саясаты мәселелеріне де жеке тоқталды. Оның айтуынша, министрліктің басым бағыттарының қатарында жастарды жұмыспен қамту, оның ішінде маусымдық еңбекпен қамту мәселелері, сондай-ақ отбасы институтын нығайту міндеттері бар. Бұл бағыттардың барлығы профильдік ведомствоның тұрақты бақылауында.