Петропавлда өткен әкелер форумында жасөспірімдерді есірткіден, лудоманиядан және өзге де тәуелділіктерден қалай қорғау керектігі талқыланды
Әкелерге арналған форум-тренингте балаларды түрлі тәуелділіктердің қалыптасуынан қорғау мәселесі көтерілді. Іс-шара Әкелер күні қарсаңында және нашақорлықтың алдын алу айлығы аясында Петропавл қаласындағы Психикалық денсаулық орталығында өтті, деп хабарлайды QZ News тілшісі.
Тренингке мемлекеттік органдардың, білім беру жүйесінің, құқық қорғау құрылымдарының өкілдері және отбасылар мен жастарға қолдау көрсететін ұйымдардың мамандары қатысты.
Психикалық денсаулық орталығының басшысы Дауренбек Бейсембаев іс-шараның негізгі мақсаттарын атап өтті. Оның айтуынша, әке – бала тәрбиесіндегі басты тұлға. Әсіресе, нашақорлық, темекі шегу, лудомания және ойынқұмарлық сияқты тәуелділіктердің алдын алуда әкенің рөлі ерекше.
«Қоғамда балалар арасындағы нашақорлық мәселесі туындап отыр. Сондықтан біз әкелерді жинадық, өйткені әке – отбасының тірегі. Әке мінсіз болуы міндетті емес, ол ең алдымен баласына дос болуы керек. Елімізде синтетикалық есірткілердің таралуы артып келеді. Сондықтан уақытты өткізіп алмай, әкелерге балаларына мұқият болудың маңызын түсіндіру қажет», – деді ол.
Биыл Психикалық денсаулық орталығы ата-аналармен жұмысты күшейтіп отыр. Бұл туралы орталық психологы Ирина Якимова мәлімдеді. Тренинг барысында қатысушыларға баланың мінез-құлқындағы алаңдатарлық белгілер туралы айтылды. Психологтың сөзінше, мұндай белгілерді байқаған жағдайда ең бастысы – баланы жазғырып, ақыл айтудан аулақ болу. Оның орнына ата-ана мен бала арасындағы сенімге негізделген ашық диалог құру қажет.
Тәуелділіктің қалыптасуына сыртқы факторлар да әсер етуі мүмкін. Солардың қатарында интернеттегі сәнге айналған үрдістер де бар. Сондықтан баланы мұндай ықпалдан байыппен әрі байқатпай қорғау маңызды.
«Шын мәнінде, тәуелділік пен тәуелді мінез-құлық біртіндеп қалыптасады. Ата-аналар назар аударуы тиіс белгілі бір белгілер мен мінез-құлық ерекшеліктері бар. Бірақ оған бақылау тұрғысынан емес, дұрыс әрі сындарлы көзқараспен қарау керек. Біз әкелермен шынайы әрі сенімді әңгіме құру үшін жиналдық. Баланың жанында әрдайым сенімді, тұрақты ересек адамның болуы өте маңызды», – деді Ирина Якимова.
Андрей Михин 10 жастағы қыз тәрбиелеп отыр. Сонымен қатар ол №7 мектепте информатика пәнінің мұғалімі болып жұмыс істейді және күн сайын балалармен араласады. Оның пікірінше, зиянды әдеттер мен тәуелділіктер туралы тақырыпты жас ұрпақпен ерте жастан бастап талқылау қажет. Сондай-ақ балаға дұрыс үлгі көрсету де маңызды.
«Мен әрдайым баламды қолдауға, көмектесуге тырысамын. Қызыммен қарым-қатынасымыз өте жақын әрі достық негізде құрылған. Бізде ұйықтар алдында әңгімелесу дәстүрі бар. Мен оның төсегінің қасына отырып, сенімді атмосферада сөйлесемін», – деді ата-ана.
Форум қорытындысында қатысушылар тағы бір маңызды тұжырымға келді: әрбір балаға әке қажет. Әке балаларды өмірдегі қиын кезеңдерден қорғап, олардың сенімді тірегі бола алады.