Петропавлдық 350 тұрғын есірткіге қарсы екі шақырымдық жүгіруге қатысты
26 маусым – Халықаралық нашақорлыққа қарсы күрес күніне орай Петропавлда ауқымды спорттық шара ұйымдастырылды. Қала тұрғындары тыйым салынған заттарсыз жарқын болашақты қолдап, екі шақырымдық жүгіруге қатысты, деп хабарлайды QZ News тілшісі.
Жарыс қаланың Орталық алаңынан бастау алып, оған шамамен 350 адам қатысты. Іс-шараны Солтүстік Қазақстан облысы Полиция департаментінің есірткі қылмысына қарсы іс-қимыл басқармасы мен Есірткі құқық бұзушылықтарының алдын алу жөніндегі кеңес мүшелері ұйымдастырды. Олар жастар арасында салауатты өмір салтын насихаттап, спортты дамытуға ерекше көңіл бөлуде.
Бастаманы жеңіл атлетикадан Азия чемпионатының жүлдегері Ольга Быченко да қолдады.
– Мен спортпен сегіз жылға жуық уақыттан бері айналысамын. Салауатты өмір салтын қолдаймын және баршаңызды зиянды әдеттерден аулақ болуға шақырамын. Спорт – өмір. Бұл жерге жалғыз емес, басқа спортшылармен бірге келдік. Осындай есірткіге қарсы жүгіру жарыстарын әрдайым қолдаймыз, – дейді спортшы.
СҚО ПД Есірткі қылмысына қарсы іс-қимыл басқармасының басшысы Руслан Үмбетов мұндай шаралардың жастарды белсенді өмір салтына баулудағы маңызын атап өтті.
– Алаңға жастардың көп жиналғанына қуаныштымын. Еліміздің болашағын құратын да, оның қандай болатынын шешетін де – сіздер. Спорт тәртіпке, мінезге және жауапкершілікке тәрбиелейді. Бұл құндылықтар есірткімен мүлдем үйлеспейді. Азаматтық ұстанымдарыңыз үшін алғысымды білдіремін, – деді ол.
Жүгіруге қатысу үшін алдын ала тіркелу талап етілмеді. Мәре сызығын алғашқылардың бірі болып кесіп өткен 50 қатысушы бағалы сыйлықтар ойнатылатын ұтысқа қатысу мүмкіндігіне ие болды.
– Жүгіруге кез келген адам, тіпті кішкентай балалар да қатыса алды. Бас жүлде ретінде велосипед дайындалды. Біз жастармен жиі жұмыс істейміз және есірткіге қарсы осындай интерактивті шараларды тұрақты түрде өткіземіз, – деді Есірткі құқық бұзушылықтарына қарсы күрес жөніндегі кеңес мүшесі әрі «Respublica» партиясының СҚО бойынша жастар қанатының жетекшісі Рүстем Ілиясов.
Жалпы, қатысушылар жарыста жеңіс үшін емес, тәуелділіктен ада, салауатты болашақты қолдау мақсатында бас қосты.