Петропавл ЖЭО-2-де жаңа жылыту маусымына дейін бес қазандық агрегатына күрделі жөндеу жүргізіледі

Петропавл ЖЭО-2-де алдағы жылыту маусымының тұрақты өтуіне тікелей әсер ететін ауқымды жөндеу науқаны жалғасуда, деп хабарлайды QZ NEWS тілшісі.

«Севказэнерго» АҚ баспасөз қызметінің мәліметінше, барлық жұмыстар бекітілген кестеге сәйкес жүргізілуде.

Биыл энергетиктер бес қазандық агрегатына күрделі жөндеу жүргізуді жоспарлап отыр. Жөндеу жұмыстарының маңызды кезеңдерінің бірі сәтті аяқталып, күрделі жөндеуден өткен №6 қазандық агрегаты қайта іске қосылды. Қазіргі уақытта негізгі күш №9, №10 және №11 қазандық агрегаттарын жөндеуге жұмылдырылған. Мамандар жабдықтарға ақау анықтау жұмыстарын жүргізіп, тозған қыздыру беттерін бөлшектеп, жөндеудің келесі кезеңіне кірісті. Стансаға жеткізілетін барлық жаңа жабдық бөлшектері алдымен міндетті түрде кіріс сапа бақылауынан өтіп, содан кейін ғана монтаж жұмыстарына жіберіледі.

Жөндеу бригадалары қазірдің өзінде қазандықтардың негізгі және қосалқы тораптарын құрастыру жұмыстарын жүргізіп жатыр. Үш қазандық агрегатындағы жұмыстар аяқталғаннан кейін мамандар бірден №8 қазандық агрегатын күрделі жөндеуге кіріседі.

«Жөндеу науқанының басты мақсаты – стансаның сенімділігін арттырып, қыс мезгіліндегі ең жоғары жүктеме кезінде оның тұрақты жұмысын қамтамасыз ету. Барлық жұмыстар бекітілген кестеге қатаң сәйкес орындалуда», – деп хабарлады «Севказэнерго» АҚ баспасөз қызметі.

Жабдықтарды кезең-кезеңімен жаңғырту Петропавл ЖЭО-2-нің сенімді жұмысын арттырып, алдағы жылыту маусымында облыс орталығы тұрғындарын үздіксіз жылумен қамтамасыз етуге мүмкіндік береді.